06/06/2009

政情:張少華紮職快有秘訣

尋日係「二○○九世界環境日」,昂坪360行政總裁張少華同一班義工去咗清潔東涌紅樹林,佢仲講笑話唔少乘客同佢講,搭纜車經過紅樹林時見到小白鷺,其實啲「小白鷺」係發泡膠箱,佢依家就要將呢啲「小白鷺」搬去屬於佢哋嘅地方,結果張少華唔止搬走晒啲「小白鷺」,仲同其他人一齊合力搬走埋一個成個人咁高嘅大車胎。

張少華下個月就調返港鐵總部,當年纜車出事,身為地鐵車輛經理嘅張少華臨危受命,被調到昂坪360做行政總裁,依家連升幾級,返總部做車務營運總管,簡直係坐直升機。不過尋日佢好謙話︰「唔係升職,係公司定期調職啫!」臨別在即,張少華話最難忘○七年昂坪360纜車重開嗰日,市民嘅正面反應就係畀佢最大嘅鼓勵喎。

紮職紮得咁快,問佢有乜成功秘訣,佢話最緊要係處事態度同「行圓志方」四個字。所謂「行圓」就係處事要周詳,因應環境執行策略,而「志方」就係做咩都要先訂立目標,就算要因應環境變化作出修訂,目標都唔會改變。咦,唔通返港鐵做車務營運總管先至係佢個人嘅真正目標?

直擊人類豬流感最新疫情
詳情瀏覽on.cc《奪命流感》