政情：蔣麗芸呢頭慳水 議員嗰頭「倒水」
立法會議員不時被踢爆大花筒，又將立法會變成私人遊樂場。立法會議員蔣麗芸（Ann）為免議員再做大嘥鬼、濫用資源，早前就向立法會行管會建議，議員每次限斟半杯水，不過阿Ann呢頭呼籲，嗰頭又有議員要求行政管理委員會（行管會）喺立法會健身室增設划艇機同乒乓波設施，真係倒米。
阿Ann尋日喺Facebook貼文，話立法會每次都會為議員斟滿一整杯水，但好多時議員都無飲完，造成浪費。佢早前去信行管會，建議每次斟水只斟半杯，而行管會亦回覆話會聽取意見。
但阿Ann呢頭為立法會慳水，嗰頭又有議員提出浪費建議。行管會尋日發問卷徵詢議員對增加健身室設施嘅意見，信中指有議員建議改善健身室設施，包括增加房間照明、 移走部分現有設施、增設划艇機及乒乓波設施同埋喺健身室裝設兩部收費電視等。
更重要嘅係，因為健身室空間不足，增加設施嘅同時要將原有儲物櫃拆走。有議員大鬧拆走儲物櫃浪費公帑，又話議員買嘢無充足理由，難以同公眾交代。講到尾，議員想划艇同打乒乓波大可買番屋企，想要就叫行管會買真係要不得！