沙田馬場尋日舉行花旗集團冠軍暨遮打盃，吸引唔少名人紅星到場觀賽，「鋼鐵大王」龐鼎元嘅遺孀龐熊少珠同兒子龐俊怡都有到場，佢哋嘅愛駒「高鳴」雖然冇競逐遮打盃，不過第四場就有出賽。阿姐汪明荃身為龐太閨中密友，尋日專程拉埋老公羅家英去為「高鳴」打氣。
阿姐話早喺「四朵金花」嘅年代已經認識龐太，月初佢同家英哥喺美國拉斯維加斯拉埋天窗，龐太都好戥佢哋高興，仲送上一封大利是賀佢哋新婚；至於銀碼有幾大，阿姐就唔肯透露。不過龐太係○八年打入《福布斯》香港四十大富豪嘅唯一女性，出手又點會低呀！
阿姐尋日着到成封大利是咁現身馬場，除咗以一條紅色花裙搶鏡外，仲手挽一個Hermes新款紅色手袋，令人眼前一亮。阿姐話個袋係好友狄波拉同契女夾份送嘅結婚禮物。阿姐圈內圈外都有唔少朋友，佢同家英哥結束二十年愛情長跑自然得到各方好友祝福，呢排肯定收賀禮都收到手軟。