本文重點
曾經四次被對手絕殺，接連受到球證不公判決，再加上遇到常規賽霸主騎士，但面對一大堆不利條件的魔術，卻將問題一一瓦解！東岸第六戰，魔術憑中鋒杜域侯活支配內線，個人轟入40分，結果以103比90主場痛擊騎士，總成績4比2淘汰奪標熱門出局，登上東岸冠軍寶座。而今次亦係魔術自九五年後，球會歷史上第二次殺入NBA總決賽。
因為騎士今季日益強大，季後賽前都冇乜人睇好魔術可以殺入總決賽，但事實證明實力較騎士全面嘅魔術先係東岸真命天子。尋日魔術收起外投打法，中鋒杜域侯活一開賽就強行爆籃，上半場一人已經攻入21分之多，協助魔術兩節過後已拉開18分領先優勢。騎士喺今個系列賽中，下半場大多失準，加上勒邦占士冇晒手感，全場20射僅得8中，最終魔術由頭帶到尾以103比90贏波，總成績4比2淘汰騎士。
創會20年東岸冠軍贈興
今年係魔術創會二十周年，能夠再次成為東岸冠軍兼打入NBA總決賽，絕對係祝賀球會嘅最佳禮物。魔術對上一次打入總決賽，已經要數到九五年，當時球隊憑狀元奧尼爾領軍殺入總決賽，估唔到十四年後再由另一位新秀狀元杜域侯活領軍完成壯舉。全場攻入40分及拉下十四個籃板球嘅杜域侯活表示：「近幾年冇人會認為魔術會強大，但我哋係一支團隊，有能力擊敗任何對手。」
大帝發脾氣唔肯握手
至於「大帝」占士今場僅射入25分，賽後更發脾氣唔肯同魔術球員握手，亦拒絕出席賽後記者會，可見「大帝」心情非常之差。今季NBA總決賽將於香港時間周五上演第一戰，先由湖人主場對魔術。