科大校長朱經武八月就任滿返美國，離別在即，慶祝活動一浪接一浪，幾百名師生尋日就以接力賽跑籌款方式送別校長，朱經武亦與眾同樂，與常務副校長錢大康同副校長黃玉山齊齊脫下西裝落場跑番轉，順便為科大「撲水」。朱校長出力之餘仲出埋錢，自揼心口捐款十萬元贊助賽跑，認真唔話得！
接力賽要求參賽者扮鬼扮馬，朱經武領軍嗰隊就以廚師Look參賽，原來佢早前喺師生面前示範用液態氮整雪糕嘅形象夠晒深入民心，今次攞番當日套廚師衫嚟循環再用，三位正副校長每人着住套衫，再配對波鞋，各人仲要揸住個象徵朱校長做嘅雪糕筒款式氣球，扮相相當搞笑。
朱經武廚藝了得，跑步就認真麻麻，落場跑咗四百公尺就叫停，擰晒頭話自己跑到上氣唔接下氣，再跑就認真攞命。校長跑步雖然唔及其他師生快，但最終誠意搭夠，帶挈隊員獲得「全場最佳服裝獎」，算係攞番個安慰獎。
朱經武一向喺科大人緣極佳，師生都好唔捨得佢走，尋日趁活動結束後憑歌寄意，播出歌后鄧麗君名曲《何日君再來》，師生們爭住上前送卡畀校長，仲夾手夾腳抬起朱經武跑咗一百公尺，玩得咁癲，校長肯定一世難忘。今次接力賽合共籌得四十多萬元，將會捐畀科大發展體育。