本文重點
前商務及經濟發展局局長馬時亨太座王培琪（Linda）自○五年以來，每年都舉辦香港區「全球祈禱日」，統籌本港基督徒與全球超過二億名信徒在同一日為世界祈禱，而今年就選定尋日舉行。金融海嘯無遠弗屆，雷曼迷債累到好多港人血本無歸，高追嘅小股民又坐艇收場，不知何年何月才望見家鄉，作為虔誠基督徒嘅肥亨，今年就特別為金融海嘯祈禱。
肥亨離開官場將近一年，但未有人走茶涼，佢太太Linda創辦嘅「全城更新」號召力依然強勁，尋日在大球場舉行嘅「全球祈禱日」，吸引幾位高官攜眷撐場，包括有「人肉錄音機」之稱嘅政制及內地事務局局長林瑞麟夫婦、保安局局長李少光夫婦及環境局局長邱騰華，幾位高官到場並非為市民祈禱，反而係為民望流血不止嘅政府祈禱，求神打救政府，變相打救自己。
至於向來高瞻遠矚嘅肥亨，就選擇為金融海嘯祈禱。佢話本港失業率攀升，雖然經濟環境未至於○三年沙士咁惡劣，但事實上好多人財富都有損失，佢作為商界及財經界一分子，都希望當前經濟困難得到解決，願神保佑香港。肥亨與Linda嘅大女馬露明尋日都有幫手，至於向神祈求咗乜嘢，就無詳細交代嘞。
出山唔從商？
肥亨日前自爆遲啲會有新搞作，有人話佢做金管局總裁，同盛傳中嘅大熱攞命陳有得揮；亦有人話西九行政總裁好啱佢，不過亦有傳話佢重返商界，佢自己就曾經講笑話，話唔定全職去傳道呢。不過講番正經嗰句，肥亨實牙實齒同我哋話，總之遲啲一定有嘢搞，但暫時唔講得住，無論做乜都好，大前提係唔會畀自己咁大壓力：「從商必定有壓力。如果要從商嘅話，倒不如留喺政府好過啦！」
換句話，肥亨無打算從商。其實無論做乜都好，過完政府嘅「冷河期」就少咗好多爭議，加上佢同各路人馬關係良好，相信必定能路路暢通。