功夫茶做過一次蚊型民意調查，問過三位朋友，睇吓佢哋對於呢個「體壇盛事」有乜嘢意見，以下係佢哋嘅講法。
朋友一號：「吓，全港運動會，乜嘢嚟㗎？」
朋友二號：「尾聲？原來開始咗㗎嗱？」
朋友三號：「哦，我知吖，全港運動會係今年年底東亞運動會嘅預演嘛，我冇去過呀，不過，聽人哋講辦得唔係幾好睇喎，仲有少少丟架添。」
由於功夫茶都冇去過，相信全港市民百分之九十九都冇去過，所以為咗印證朋友三號有冇亂報流料，功夫茶特登走去再訪問三位記者，以下係佢哋嘅講法。
記者一號：「港運會嘅主場館係將軍澳運動場，呢度亦係將來東亞運嘅主場館。呢個場不但交通唔係幾方便，而且設施麻麻地，譬如話，跑道係有好多積水嘅，運動員一個唔覺意就會跣到攤攤腰。」
記者二號：「將軍澳運動場呢，咳……咳……係會令人呼吸困難嘅，因為……咳……咳……呢個場四周圍都係馬路，汽車廢氣飄晒過嚟。假如有重型車輛經過……咳……咳……仲嘈到拆天，令到運動員好難集中精神。」
記者三號：「另一個場館係西區公園體育館，交通固之然唔方便，呢個場最大嘅問題係一落雨就漏水，漏到叭叭聲嗰隻，工作人員要擺出極其壯觀嘅膠桶陣接水。」
訪問到此為止，交番畀功夫茶評一評理。一句講晒，確係丟架！
喂，室外場就積水，室內場就漏水，主辦單位真係水皮個水。呢次就話全港運動會，閂埋門自己醜畀自己睇啫，將來東亞運雲集各國精英喎，外國傳媒將呢啲咁羞家嘅鏡頭播晒出街，點算呀？
積水漏水都未算最水皮，你估港運會嘅入座率有幾高呢？政府已經係免費派發門票㗎嘞，點知原來送都冇人睇。以五月十六日田徑賽為例，入座率只係一成；以五月二十四日羽毛球賽為例，二千七百個座位，吉咗二千五百個。
不過諗諗吓，場面冷冷清清可能都有好處，冇咁多人見到積水漏水嘅失禮場面吖嘛。
因乜解究成個賽事搞到水鬥水？首先，特區政府好孤寒，撥款只係雞碎咁多九百萬；大家應該有睇尋晚歐冠盃決賽曼聯對巴塞㗎啦，九百萬淨係夠其中一個球星出一個月糧咋！其次，大家都知，香港人最熱愛嘅運動始終係足球，港運會居然冇足球比賽喎！仲有，大會規定，但凡參加過國際大型賽事嘅精英運動員，一律唔准玩，你話有乜睇頭先？
愈講愈驚，東亞運話咁快就要開波，作為預演嘅港運會搞到唔湯唔水，到時會唔會淪為國際大笑話㗎？觀眾會唔會冇眼睇㗎？或者咁啦，東亞運為每位觀眾提供雨褸，到時場館漏水咯喎，唔使濕身吖嘛！