財政司司長鬍鬚曾前日高調宣布總值一百六十八億元嘅所謂加碼紓困措施，但其實大部分內容都係「炒冷飯」同「炒雜錦」，將三個月前預算案先啱啱提出嘅措施稍為延長同擴大，當係新嘢再公布一次，擺明將「一餐飯分開兩餐食」，為稍後舉行嘅七一遊行降溫。鬍鬚曾為求盡快攞到呢個彩，仲夾埋商務及經濟發展局局長劉吳惠蘭（Rita），要求財委會畀佢哋打尖申請撥款推行有關措施，辣㷫晒班立法會議員。
鬍鬚曾今年份預算案同市民訴求嚴重脫節，錄得歷來最多反對票，但佢唔單止冇好好吸取教訓，仲學埋佢老細煲呔曾啲親疏有別惡習，拒絕同投咗反對票嘅議員會面商討加碼措施。到尋日正式公布加碼方案時，又冇同時向立法會作出匯報，連唔少建制派議員亦大感不滿，質疑鬍鬚曾當正佢哋係橡皮圖章，一定要無條件賣帳畀佢。
無視程序 打尖攞錢
更離譜嘅係，鬍鬚曾一方面為政治理由決定押後派糖，另一方面又要求議員火速通過佢呢堆遲來的措施，無視立法會嘅既定程序，好似將中小企貸款計劃嘅政府承擔額由七成提高至八成嘅建議，業界晨早喺幾個月前已經提出，但政府一直都充耳不聞。到前日政府終於宣布肯採納，Rita又意欲跳過將建議提交予相關事務委員會過冷河嘅程序，要求直上財委會申請撥款，變相打尖問立法會攞錢。
改一改口 前功盡廢
財委會主席最後以不合規程為由拒絕咗有關要求，Rita惟有改為向工商事務委員會主席方剛埋手，要求委員會喺下周一緊急開會，補做所需嘅過冷河程序，名副其實係自己攞嚟衰。
此外，政府早前向立法會提交草案，落實預算案提出最多退稅六千元嘅建議，立法會一早已完成審議，只待政府落order將草案恢復二讀同三讀。依家鬍鬚曾又將退稅上限提高到八千元，鬍鬚曾一改口，立法會又要開會傾過，唔知又要嘥多幾多時間同公帑！