功夫茶硬係唔明，旺角西洋菜街路人甲乙丙同你無冤無仇，擲物狂徒點解咁鍾意專揀呢個行人專區亂掟鏹水彈？萬一唔覺意掟中你阿媽，咁點算？五個月前掟過兩個，今次又整多兩嘢，聽講話用嚟施襲嘅通渠水係同一牌子添。好明顯，兩單案嘅兇徒好大可能係同一個人，相信係心理變態嘅，警方如果唔快啲破案捉人，鏹水恐襲睇怕陸續有來。
話時話，警方確係有少少甩鬚喎，第一次事發係舊年十二月十三日，當時造成四十六人受傷，警方懸紅十萬元緝兇，吖，居然至今茫無頭緒。
事隔五個月重施故技，今次再有三十人受傷，三歲細路哥都睇得出，變態兇徒唔止要傷害無辜市民，而且係要向警方發出挑釁訊號：咁叻捉我吖，捉得到，畀個毫子你買紅棗！
咦，咪住，今年五月八日同一地點附近亦都試過有石頭從高處墮下擊傷途人喎，會唔會有關嘅呢？唔該警察叔叔嘞，真係快啲破案捉人嘞，如果唔係，唔通你叫西洋菜街所有行人着雨褸、戴鋼盔咩？
唉，講到尾，一日都係官僚作風累事。自從發生過第一次鏹水彈襲擊之後，油尖旺區議會已經通過安裝俗稱「天眼」嘅閉路電視，防止再次遇襲，點知政府遲遲都未裝。喂，天眼唔打得都嚇得吖嘛，試諗諗，假如你係擲物狂徒，會唔會明知有閉路電視全天候攝錄，你都照掟可也呢？梗係唔會啦，除非你冇飯食博坐監嘅啫。
提起官僚作風，大家又記唔記得紅磡嗰單鐵閘殺人事件？社署轄下一個庇護工場嘅二百磅鐵閘，晨早知道有損壞㗎嘞，晨早決定要更換㗎嘞，晨早搵定鐵閘商㗎嘞，點不知，懶到出汁嘅官僚就係拖拖拉拉，生銹鐵閘遲遲唔換，卒之喺母親節之前砰嘭一嘢冧落嚟，砸死一個好媽媽。
再講遠少少，舊年赤柱冧樹砸死女生，罪魁禍首又係驗樹驗到敷衍塞責嘅官僚作風，死因庭都話呢單慘劇原本係可以避免嘅。
一次係咁，兩次係咁，餐餐都係咁，特區政府嘅懶骨頭官僚要害死幾多人先至安樂呢？旺角固然遲遲未安裝天眼，其實另一單關於天眼嘅事亦都好離譜。
話說○三年沙士之後，全港好多衞生黑點裝咗閉路電視，防止垃圾蟲搞到後巷污糟邋遢，隔咗冇耐，政府竟然話喎，衞生環境改善咗好多㗎喇，所以天眼全部拆除！
呢嗱，就咁，衞生黑點又冇天眼，空襲黑點又冇天眼，功夫茶惟有仰天長嘆：天冇眼呀！呢鋪真係天冇眼！
喂喂喂，咪住先，冇天眼啫，因乜解究忽然變咗天冇眼？無他嘅，懶官當道吖嘛，草菅人命吖嘛，咁咪就係天冇眼囉！