「一日清潔騷，百日亂糟糟」，「功夫茶」呢條題夠盞鬼。講真喇，政府做騷，無論係消費或者「全城大清潔」，都係得啖笑！唐唐領大軍殺去深水埗搞清潔，老朽以為佢用把口噏「一個菠蘿包救經濟」，今趟必定示範如何「一支掃把搞清潔」，誰知拉慣頭馬、摸慣酒杯底嘅唐唐只係行行企企，派吓防疫包，這樣「看上去很美」，咁領導清潔，只能應了香港三字經的「無厘頭，屙奶油」！
當然，有啲高官出晒力，好似德成局長揸掃把洗平台、戴手套擦簷篷，真係有姿勢有實際，十足「窮人的孩子早當家」咁款，老朽不禁浮起商機：「德成介紹，安心聘用；德成男傭，融入家中」！
搞清潔衞生，從深水埗、旺角等食肆林立嘅地方做起，可謂踏出正確第一步！唔通走去山頂道、淺水灣道、麥當奴道、香島道豪宅區搞清潔咩？不過，污糟開嘅地方，並非一日清潔騷後就可「一騷永逸」，要「察而時督之」，渠務署路政署等要搞好路面及坑渠，不令藏垢污水亂滴漏，食環署要搞好啲垃圾雜物，並非一暴十寒。十八區每區派五十萬搞吓清潔，咁就想白璧無瑕？
清潔運動搞咗幾十年，捉垃圾蟲亦捉到地老天荒，試問搞出乜嘢成績？可以話，政府無論在執法、教育、宣傳上都完全失敗！再咁搞下去，老朽相信不久「功夫茶」又可大聲疾呼：「再演清潔騷，百年亂糟糟」！
大家都睇過武打片，用刀槍棍棒的，通常打不過手執一支簫或一把紙扇者，強中強的，通常氣定神閒，一吐氣、一揮袍，已可殺敵於無形！所以話，高手過招，何須敲鑼打鼓大鳴大放！計我話，要使出真功夫，好易啫！一眾高官發揮鄧小平「白貓黑貓論」，齊齊去鼠患區如油尖旺捉老鼠喇！此外，由邱騰華及潘潔領軍，人工過十萬蚊嘅都要去植樹，如此藍天可期，香港人人愛矣！