長江製衣創辦人兼慈善家陳瑞球早前捐出一千八百萬支持科大校園建設，科大投桃報李，尋日將其中一幢學生宿舍以球伯及其太太林滿珍名義命名，球伯主持命名禮時借機冧太太，話今次係人生中首次有建築物以佢夫婦二人命名，咁啱係佢同太太結婚六十五周年，正係最佳嘅紀念禮物。
紡織界名人球伯辦喜事，城中名人盡出，除咗有來自紡織世家嘅方鏗及立法會議員梁君彥、梁劉柔芬外，仲有教育局局長孫明揚以及馬會大董葉澍堃，葉澍堃話一年冇見球伯，尋日特別嚟撐場。球伯叫齊四子二女、孫兒及外曾孫，合共四代人一齊到賀，場面墟冚。
球伯致辭時多次提及太太，話太太近日健康欠佳，但得悉要出席命名禮，即花心思打扮兩粒鐘，球伯講出太太嘅小秘密後見對方冇反應，忍唔住當眾打情罵俏話：「點解你唔笑嘅？係咪聽唔到我講嘢呀？」陳太擰頭示意聽唔到佢講嘢，球伯就打圓場話：「咁返屋企至講喇！」呢招博愛妻一笑登時引來哄堂大笑。
結婚65周年返澳門
球伯又不忘大晒幸福，話年底就係兩人結婚六十五周年，正計劃重返當年結婚地澳門，緬懷昔日片段，可惜當年擺酒嗰間酒樓已經拆咗喎。講起捐錢畀科大，球伯話背後有段古，皆因佢年輕時讀至初中就經歷戰亂，冇機會入大學讀書，依家一有錢就捐助教育事業，作育英才。
陳永棋懶理豬流感
卓妮轉頭見到球伯姪兒、全國政協常委陳永棋，講起豬流感蔓延，佢話呢種病毒嘅殺傷力比想像中低，毋須大驚小怪，暑假會照樣飛去歐洲探望孫兒。
同場仲有前貿易發展局總裁施祖祥（Michael），卓妮見佢攞起自己條藍色領呔同棋哥細心研究，以為佢哋交流打呔心得，原來條領呔係十幾年前球伯間製衣廠嘅出品，尋日專登摷番出嚟，賀吓球伯喎。
卓妮