本文重點
中央批准立法會兩個事務委員會後日組團訪問珠三角，原意係想喺七一前營造和諧氣氛，但點知就反而製造出唔少零零星星嘅紛爭。先有多名無證泛民議員投訴被歧視，質疑有關當局要佢哋喺指定時間同指定地點過關，好似喺內地犯咗事畀人「雙規」咁。之後立法會決定對所有團友一視同仁，一律唔畀遲到早退，又引起部分有證嘅建制派議員不滿，至今已經有三人申請退團，令訪粵團人數買少見少。
訪粵團要喺四日三夜內遊勻四個廣東省城市同八個景點，仲趕過好多掠水鴨仔團。最慘係對於嗰啲成日北上嘅有證議員嚟講，大部分景點佢哋都已經去過，將會會見嘅內地官員亦晨早識晒，今次上去九成九會淪為班無證議員搞政治騷嘅活動布景板。所以喺上個禮拜截止報名時，廿四名合資格報團嘅建制派議員之中，有成六人冇報名，甩底率高達四分之一，高過泛民議員好多。
劉秀成石禮謙李慧琼離隊
其後立法會為咗平息班無證議員嘅不滿，規定所有團友都要被「雙規」，就令班有證議員更為不滿。同屬專業會議嘅劉秀成、石禮謙同民建聯嘅李慧琼，近日就以不同理由申請退團，截至尋日，已有接近四成建制派議員甩底。
本身代表建築界嘅劉秀成同我哋講，佢晨早就定咗隨同商務及經濟發展局局長劉吳惠蘭出訪意大利，協助推廣香港嘅紅酒業同城規發展，原本諗住喺周日深夜飛返香港，再通宵坐車北上會合其他團友，依家訪粵團話唔准中途插隊，佢就唔使再趕喉趕命嘞。再者其實佢自己成日都有上珠三角訪問，同當地嘅建築相關官員一向有偈傾，今次退團對自己及其業界都毫無損失。
李慧琼亦表示，本來諗住喺周六晚或者周日朝早提早離團，趕返香港參加一個訓練課程，既然立法會決定唔畀團友早退，加上佢有多名黨友都已經報咗團，多佢一個唔多，佢就無謂再強人所難喇！
我哋尋日搵唔到石禮謙回應，但其實佢之前亦公開呻過，話男人最驚就係腎虧，依家仲要「雙規」，認真唔老利。最特別係佢同劉秀成雙雙退團後，訪粵團一個專業會議嘅議員都冇，唔知情嘅仲以為佢哋專登玩杯葛添。根據過往經驗，估計到訪粵團真正出發時，會有更多團友臨時甩底放飛機，如果最後搞到隨團採訪嘅記者仲多過啲議員，咁就真係失禮死人。