自由黨提議政府派發消費券多時都不獲接納，副主席方剛一於自行發功，近排以齊抗金融海嘯大聯盟召集人嘅身份發起業界自救派消費券嘅活動，佢早前就聯同旅發局主席田北俊同自由黨另一副主席張宇人，齊齊喺銅鑼灣時代廣場向途人派發消費券。
後日就係一年一度嘅母親節，方剛話就算再忙都要抽時間陪媽咪食餐飯。不過，方剛嘅囡囡依家喺美國工作，趕唔切返香港過節，所以佢哋今年未必可以三代同堂一齊慶祝母親節喇。方剛嘅囡囡雖然身在美國，但依然花心思準備禮物，仲拜託秘書訂花氹番媽咪，正所謂物輕情義重，方太見個女咁貼心，仲點會嬲得落呀！
講開母親節，方剛忽然感觸良多，慨嘆香港人成日忙到想見屋企人一面都難，所以難免會忽略家中長者，佢就覺得只要有心，閒時抽少少時間打電話同媽咪傾吓電話，老人家都會好開心。
方剛平時咁忙，唔知會唔會連打電話嘅時間都冇呢？佢笑言，好彩媽咪就住喺自己樓下，平時要見面都好方便，所以絕對唔會因工作忙而冷落方媽媽。