好多人都知道馬會董事、律師會前會長周永健有個乖仔Justin，現時喺英國倫敦大學攻讀法律系，讀多兩年就可以畢業做律師繼承周董衣鉢，周太胡慕芳都係律師，三人一於組織律師家庭。不過，要成為執業律師，必須經過實習階段，律師行內叫做Articled Clerk，Justin就開到聲想父親收佢為徒。
卓妮大前晚在馬會主席陳祖澤（John）六十六歲生日會上，見到周永健夫婦帶埋囝囝Justin去見世面。問Justin將來做實習律師會搵邊個師傅、想唔想父親周董教佢呢？Justin就話：「我梗係想啦，但唔知Daddy收唔收我啫？」周董就話：「接班？等佢自己慢慢努力吓先啦！」
周太胡慕芳本身都係律師，九三年起出任和黃執行董事，現為副董事總經理，被外界喻為「和黃一姐」同「打工王后」。
身為馬會首位女大董嘅人大常委范徐麗泰都有出席阿John嘅生日會，佢雖然事忙稍遲抵埗，但都趕得及同阿John切壽包，總之大家都好畀面。
卓妮