受地理位置所限，九龍公園柯士甸道停車場只設有十八個車位，不但長期有車滿之患，「倒灌」的車龍更造成嚴重擠塞。
每日均會駕車到九龍公園泳池游泳的陳先生直指問題與設計出錯有關，「個入閘設計好有問題，個個都落車拍卡，唔止嘥時間，仲會阻住後面啲車，搞到成條行車線都塞晒！」
就現場所見，所有進入停車場的司機均需一一落車拍卡，隨後進入停車場的汽車則需違規停於行人路上，過路行人不斷於車頭車尾間「攝位」而行。由於等候入閘車龍同時佔去柯士甸道其中一條行車線，連帶警署出入口亦被阻塞，尾隨車輛需紛紛打燈切線，亦有司機不斷響號，情況非常混亂。
油尖旺區議會副主席梁偉權亦認同該停車場設計存在問題，令交通嚴重擠塞：「我自己都受過苦，吓吓都要落車拍卡，搞到入閘時間長咗，嗰度又冇位，等入閘就會阻住行人路同柯士甸道。」梁認為康文署應徹底改善停車場入口的設施，如先入閘、後取票等，確保車場及附近交通流暢。
康文署發言人強調，有關位置需同時供旅遊巴、工程車以及消防車等大型車輛出入，若將八達通收費器置於通道中央，將令通道收窄，阻礙大型車輛出入。
不過，香港汽車高級駕駛協會主席蒙海強直指停車場設計失誤，批評康文署忽視駕駛安全，「香港係右軚車，擺個八達通機喺左邊一定係錯，根據香港嘅driving rules（道路交通規例），司機一離開架車就要熄匙，停喺行人路一樣犯法，根本就冇人落車拍卡會熄匙，康文署有冇留意呢一點，咁樣即係教唆人犯法。」
拒改設計毫無理由
對康文署以大型車出入為由拒將八達通機放置中央之說，蒙怒斥根本「唔成理由」，「咁講即係話個入口根本係唔夠闊，又係設計有錯！」
運輸署發言人證實，道路交通（交通管制）規例第374章規定，任何駕駛者不得在引擎啟動下離開車輛，違者可判罰款二千元。另外，根據374C章，任何車輛停留在道路上，並可能危及其他使用該道路者，即屬犯罪，可被判罰款二千元。
記者 李世華