呢嗱嗱嗱，平機會又嚟傢伙，主席鄧爾邦話喎，建議政府設立「平等機會審裁處」，專責處理涉及歧視嘅案件，而且將審裁處作為獨立司法機關，由區域法院法官擔任審裁官。
鄧爾邦嘅理由係話，家陣涉及歧視嘅個案係由區域法院根據民事訴訟程序處理嘅，申訴人如果要自己出錢請律師打官司，可能會因為訴訟費太貴而卻步。假如有一個易於使用嘅審裁制度，就會更加方便申訴人嘞。
實情係咪咁呢？計功夫茶話齋，方便無疑係方便，不過唔係方便申訴人，而係方便平機會，畀佢哋更加容易添煩添亂！
即係咁，任何工具基本上都係中性嘅，冇好壞之分，視乎用家係邊個。用家如果係正人君子，易於使用冇問題，用家一旦係奸狡小人咯喎，易於使用等於易於濫用。打個譬喻，一支槍落喺正義警察手上，梗係冇問題啦，除暴安良添，同樣嘅一支槍，落喺冷血警魔手上，咁就搞出人命嘞。
平機會係君子定係小人？齋講冇用，不如睇睇真人真事。
前年十月，平機會接到一個患有精神病嘅市民投訴，指控一個社工鬧佢「黐線」，而且經常唔聽電話，涉嫌觸犯《殘疾歧視條例》。平機會居然未查先判，建議被投訴嘅社工道歉兼賠償。社工堅持自己冇錯，平機會跟住就正式調查嘞。一查就查咗五個月，期間不斷催逼社工提供資料。社工不勝其煩，加上工作壓力沉重，結果患上情緒病同埋胃炎。
如果投訴成立，社工受到平機會摧殘致病都心甘命抵，慘就慘在，投訴最終唔成立！平機會摧殘嘅係一介良民！
投訴點解會唔成立嘅呢？欺善怕惡囉，因為社工搵工會幫手，平機會即刻以「無法證實投訴」草草了事。欺負落單嘅細路就話容易啫，細路嘅家人企出嚟撐腰吖嘛，大蝦細嘅惡霸馬上頭耷耷冚旗。
處理歧視個案已經亂嚟，處理公帑更加烏煙瘴氣。鄧爾邦試過攞三十七萬公帑舉辦豪華研討會，結果要向政府解釋。鄧爾邦任期要到二○一二年先至屆滿，到時會唔會因為數簿有問題而落台都未知，佢居然預先攞咗兩成半合共一百六十萬酬金。至於頻密出差呀，搭飛機硬係要升格坐頭等呀，司機申領超時工作補水涉嫌報大數呀，講起上嚟一匹布咁長。
簡而言之，平機會信唔過，所以千祈唔可以畀機會佢易於濫用獨立運作嘅審裁處！
話時話，審計署查完數未啫？功夫茶條頸等到長咗，唔靚仔㗎！