本文重點
金融海嘯吹襲，大學生畢業等於失業，煲呔曾度出嚟嘅大學生實習計劃，預計八月先至出到台，對好多五月就畢業嘅大學生嚟講，真係止到痕止唔到痛，等佢蛇都死。本港三個青年團體，即係香港青聯、菁英會同國際青年商會香港總會，眼見呢班青年待業大軍心焦如焚，決定伸出援手，搶先政府飲頭啖湯辦就業招聘會，推出逾五百個職位，等大家暫時止止渴。中央一直想培育香港富豪和名人嘅年輕第二代接班，為社會做啲事，睇嚟開始見到成績嘞！
呢個由香港三大青年團體合辦嘅招聘會，話做就做，下個星期六（十八日）喺由民政事務局支持借出嘅柴灣香港青年發展中心舉行，現場將有三十幾個檔位，超過五百份工，由收銀員到見習經理都有，人工最平五千五百蚊，有啲過萬蚊，喺今時今日有份工已經算唔錯嘅艱難日子，對青年人嚟講，呢個招聘會可謂係及時雨，點計都實際過政府嗰個行動慢幾拍嘅大學生見習計劃。令人好奇嘅係，青年團體都搞到大型招聘會，因乜咁把炮？
背景雄厚 揼心口掘空缺
呢幾個青年團體，唔少核心都係政商界嘅第二代，好似香港青聯主席許華傑係已故進出口界立法會議員許長青公子；菁英會主席施榮忻係全國政協委員施子清兒子咁，本身擁有深厚人脈，揼商界心口，事半功倍；下屆香港青聯主席熱門陳仲尼聞說都背景雄厚。青聯仲特登成立一支揼心口部隊，好似政黨選舉掘票咁，地氈式將職位空缺逐個掘出嚟，領軍嗰個，就係港協暨奧委會秘書長彭沖嘅愛女彭芷君。港府如果學到佢哋一半心法，香港大學生依家就唔使咁愁嘞！
本身有條件嘅，更加出錢出力製造職位，好似許華傑做秘書長嘅中華出入口商會就會招聘文員；陳仲尼做證券，自己就準備請番個行政助理；身兼香港青聯副主席嘅「彤叔」鄭裕彤長子嫡孫鄭志剛，就揼番集團旗下新世界酒店管理同新世界電訊心口，夾埋提供逾十個職位。有佢哋背後一支支大水喉射住，先至造就出呢場打救大學生失業大軍嘅及時雨。
三大青年團體領袖強調，招聘會嘅職位，唔係實習位，同場亦有就職輔導講座。不過，佢哋唔擔保嚟搵工同搵人嘅，都一定如願以償，媒人都唔包生仔啦，搵工都係要靠自己實力。