本文重點
前日有報道指旅遊界立法會議員謝偉俊（阿Paul）同佢女友白姐姐發生情變，記者前晚call極阿Paul都冇覆機，尋日朝早亦唔見佢返立法會，令人以為佢係要刻意避傳媒。其實佢只係等緊白姐姐下午開記者會一次過澄清，並且冇因為呢啲煲水新聞而影響公務，昨早按原定計劃跟隨立法會工商事務委員會正副主席方剛同黃定光，一齊去應科院參觀。
方剛喺中午畀卓妮問番是次參觀活動時，先知道阿Paul同白姐姐單嘢，可惜佢平日冇睇開娛樂版，錯失向阿Paul攞料嘅良機。雖然佢對事件所知唔多，但仍然對阿Paul投下信心一票，相信純粹係因為阿Paul做咗立法會議員，啲人貪佢有錢有權又有面，先有咁多狂蜂浪蝶主動撲埋嚟。
恨抱孫埋怨囝囝
講番方剛自己，佢話最近因為膠袋稅、食物回收法同民間消費券等問題，忙到連陪太太都唔得閒，惟有喺嚟緊嘅復活節假期補數，同太太去泰國玩番幾日。問佢幾時有孫抱，佢就好肉緊咁話個仔「唔聽話」，遲遲都未幫佢繼後香燈。其實方公子依家只係三十零歲，結咗婚都未夠一年，囡囡亦只係結咗婚兩、三年，唔需要太心急喇！
講開抱孫，卓妮前日撞到另一個恨抱孫恨到發燒嘅另一自由黨副主席張宇人，赫然發現佢一度失咗蹤嘅大肚腩再度浮現。佢笑言自己嘅體重同最近嘅恒指走勢一樣，喺低位反彈番唔少，但離歷史高位一百九十幾磅仲相差好遠，仲有空間繼續食。
卓妮
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |