天文台台長任內有冇乜嘢遺憾呀？超英哥哥話喎，比較遺憾嘅係無法令到市民明白，颱風來襲應該做好防備。佢認為城市生活導致香港人對自然變化嘅感覺遲鈍，往往輕視自然力量，八號烈風訊號只係放假代名詞，即使風球高高掛，仍然有人冒險外出尋歡作樂。
計功夫茶話齋，林超英講漏咗一樣嘢。冇錯，城市人對自然變化嘅感覺係遲鈍，之但係，因乜事幹有咁多人唔怕八號風球，成日躝街睇風景，甚至戇居居滑浪呢？當中有一個好重要嘅原因，喂，天文台嘅預測成日都係顛三倒八，市民梗係當你嘅警告係流㗎啦，佢哋唔係輕視自然力量，而係輕視天文台嘅警告力量！
天文台經常將香港市民玩到殘一殘，社會秩序搞到亂一亂。風球明明係三號，風力居然係九號；風球明明係八號，風力弱到似一號。最倒瀉籮蟹嗰次係○六年，颱風派比安襲港，橫風橫雨吹到市民裙拉褲甩，哈，天文台唔知搞邊科，硬係唔肯掛八號波，堅持風力只係屬於三號級別，變相唔准全人類放工返屋企避難。事後發現，原來感覺遲鈍嗰個係天文台，佢哋淨係根據「維港之內」嘅風速去決定掛乜嘢風球，「維港之外」例如大嶼山赤鱲角機場，即使風力足以吹到一架飛機反肚，天文台都係唔會理嘅。
如果功夫茶係林超英，對於繼任人會有咁樣嘅寄望：下任台長呀，你生生性性，唔好再犯我嘅錯誤，我官僚僵化咁樣去決定掛乜嘢風球係唔啱嘅，你應該將全港範圍嘅風力都計算在內。仲有一樣嘢，天文台當初取消五號風球係非常失敗嘅，我希望你撥亂反正，恢復五號風球作為三號以及八號嘅緩衝。
大家試諗諗，派比安襲港之時，假如有一個五號仔作為選擇，林超英咪唔使舉棋不定囉。家陣嘅制度，簡直係自尋煩惱，台長永遠好似一個傻仔咁猶豫不決，掛三號？掛八號？掛三號？掛八號？卒之就變咗顛三倒八嘞。
吖，話時話，林超英仲有一單畸屎畀人鬧到飛起。舊年颱風鸚鵡襲港，天文台預報將於「清晨」掛八號波，人人心諗，清晨即係早晨啦，應該唔使返工喇啩。點知一個屈尾十，天文台漏夜改發八號烈風訊號，天光之後取消，市民完全冇心理準備之下急急腳趕返工。林台長話喎，「清晨」嘅意思係「一點至四點」，全世界畀佢吹到啤一聲。
如果功夫茶真係林超英，對於繼任人會有另一個寄望：下任台長呀，你醒醒定定，唔好再學我跣到市民一仆一碌，唔好再用混淆不清嘅「清晨」，直接講幾多點掛乜嘢風球。你要設身處地諗一諗，瞓到傻吓傻吓嘅小市民，一擘大眼發覺原來要返工，裙拉褲甩嘅程度慘過打風！