壞電梯拒封 食署靠害
街市扶手電梯故障沒圍封，老弱出入安全無保障！深水埗北河街街巿人流暢旺，惟早前其中兩組下行扶手梯同時故障，因需越洋訂購零件而遲遲未有展開維修，期間又不作圍封，不少長者仍手持「一袋二袋」拾級而下，艱辛之餘亦容易釀成意外。立法會議員批評食物環境衞生署跟進緩慢，更擔心倘有事故，事主亦或未受保險保障。
「好多老人家會喺呢度買餸，另一邊嗰條下行嘅扶手梯早個幾月都已經壞咗一直冇整，依家正門呢邊又壞埋，好唔方便！」深水埗居民陳先生於九月中旬在北河街街市購物時，發現位於街市正門連接一樓的下行扶手梯停止運作，告示雖指扶手帶出現問題，惟遲遲未見任何跟進，令整個街市只餘下一條下行的扶手梯可用，「有時連剩低嗰條扶手梯都會突然壞咗，成個場就會有上冇落幾個鐘！」
稱需待海外付運零件
陳又指，兩組的下行扶手梯雖損壞而停止運作，不過食環署卻未有圍封，因此不少長者仍會拖着手推車，或挽着餸菜「撐樓梯」，當中更有行動不便者持拐杖拾級而下，「啲梯級咁高，陣間啲老人家一個唔覺意差錯腳碌落去，咁就大件事啦！」
食環署發言人表示，分別於七月及九月發現一樓往地下兩條下行扶手梯的扶手帶損毀，遂通知相關部門進行緊急維修，惟由於相關零件需從海外付運，所以維修時間較長，而七月損毀的扶手梯在九月下旬已修妥及恢復運作。
發言人同時證實，於過去三個月內曾接獲二十四宗北河街街市扶手電梯的輕微故障報告，但強調期間未有任何意外發生。
工程師盧覺強表示，估計扶手梯長期運作，造成扶手帶拉長，以致推動時扶手帶未能與梯級同步運行，「好似皮帶用得耐都會鬆咗咁，如果係咁就會有一定危險，因為唔同步會拉後個重心，扶得唔好就好容易會跌。」
第三者保險或不賠償
「膠帶都只係一啲普通零件，同埋用得耐一定會有耗損，唔明點解咁都要去到外國訂先有，令人感覺好似有啲拖延咁！」立法會議員張國柱批評，相關零件並不罕見，市面上或有庫存，難以理解需等候多時方能開始維修。張又指食環署未有圍封損壞的扶手梯，如發生意外隨時「口同鼻拗」，「冇做好措施預防意外發生，講到尾就一定係食環責任，但最後分分鐘會拗啲人明知條梯壞都照行，第三者保險未必有得賠。」
記者︰黃芷君、呂耀焜
攝影︰詹海萍