喺英國倫敦展覽中心舉行嘅二十國集團峰會（簡稱G20）喺上星期四圓滿落幕，不過短短兩日嘅G20峰會竟然離奇地令行政會議召集人梁振英（CY）有機會環遊世界一周。
CY原本喺今個月初要去倫敦開會，因為佢公司嘅總部喺倫敦，點知佢公司嘅總部咁啱喺G20峰會會場附近，而且仲同各國示威者一度試圖闖入嘅英國中央銀行，相距只有一百碼，所以當地嘅氣氛十分之緊張，CY同一眾公司高層為免會議受到示威影響，最後決定將開會地點由倫敦改為巴黎。
CY見行程有變亦趁機順勢策劃一趟旅行，佢話會議結束之後諗住攞多兩個禮拜假，由巴黎飛去美國嘅波士頓同華盛頓，除咗探吓班舊朋友之外，仲希望喺當地結識到新朋友，離開美國之後仲會即刻飛去日本嘅東京旅遊兼處理公務。CY今次可以用十二日就由法國去美國，再到日本跟手返香港，一口氣環繞地球一周，真係要多得G20峰會呀。