前立法會議員李家祥自從淡出議會只做全國政協委員後，專心做回會計老本行，閒時不忙入沙田馬場輕鬆吓，結果佢同友人合資嘅團體馬「相見歡」勝出頭馬，贏得三十五萬六千幾銀獎金，拿拿臨同太太一齊開香檳慶祝。
李家祥拉完頭馬後，同記者講到會計界市道。佢坦言受金融海嘯影響，唔少公司因為上市計劃「撻Ｑ」，幫手籌備上市安排嘅會計師樓都受累，筆服務費難收咗，但幸好未致變成壞帳。
不過整體嚟講，會計師樓生意依然長做長有，不論經濟好壞都有人敲門，佢笑言以前賺公司上市嘅開心錢，依家就賺公司清盤嘅傷心錢，雖然客人面口截然不同，不過既然有錢收，都唔計得咁多。
講到今年經濟是否有望見底，佢就話咪太樂觀，事關經濟低潮往往喺股市大插後六至九個月後先出現，即係話經濟最壞嘅日子仍然未到，大家要有心理準備勒緊褲頭度日，講到經濟復甦，佢預言至少要等兩年，想大舉入市投資的話，都係睇定啲好。