本文重點
鬍鬚曾曾俊華份假大空財政預算案劣評如潮，至今僅有二十名議員表明現身投支持票，預算案可能首次遭否決，就算夠票通過，喺立法會所得支持票都會創新低。距離預算案表決日尚餘兩星期，但係鬍鬚曾不務正業，箍票工作放軟手腳，反而閉關苦練官場攝石人秘技，繼早前喺網誌「自爆」識得武術片《葉問》男主角甄子丹博出位之後，尋日鬍鬚曾重施故技，大耍擅長認親認戚嘅看家本領，今次被鬍鬚曾過刀嘅，係一代宗師黃飛鴻。
改編自一代詠春宗師事迹嘅武術片《葉問》大賣，一度喺功夫迷圈子掀起一陣子葉問熱，自稱食過夜粥嘅鬍鬚曾，攝位功夫快、狠、準，即刻將自己同甄子丹三十年前認識嘅舊事，喺櫃桶底摷番出嚟，大書特書，講穿咗即係靠黐博曝光。諗唔到兩個月唔到，鬍鬚曾又借已故武術宗師自抬身價，而且手法有變本加厲嘅趨勢。
自認曾曾徒孫
鬍鬚曾尋日以「偶像系列之十 –– My Kungfu Hero前傳」為題，喺網誌話同大家分享佢師傅鄺鐵夫嘅師傅「林祖師公」嘅生平點滴。據鬍鬚曾介紹，「林祖師公」擅長洪家虎鶴派傳統套路，拳法剛柔並濟，已達化境，對發揚洪拳功不可沒。不過，講到底，「林祖師公」何許人也？鬍鬚曾指，係「豬肉榮」林世榮嘅姪仔兼徒弟，追源溯宗，算盤打埋，亦即係黃飛鴻嘅徒孫也。咁鬍鬚曾又係黃飛鴻嘅乜嘢人呢？係曾曾徒孫囉。鬍鬚曾唔覺唔覺又借師祖揚名，呢門走位秘技，可真獨步天下，鬍鬚曾掌握嘅火候，就真係已臻化境嘞。
黃飛鴻師傅一生耿直，討厭巧佞之人，泉下有靈，對鬍鬚曾呢位曾曾徒孫，唔知有何觀感？不過，今屆班立法會議員對鬍鬚曾無乜好感，就幾可肯定。預算案將喺今個月二十二日表決，民建聯黃容根同工聯會黃國健表明有事會缺席，勞聯李鳳英亦隨時唔能夠現身，理由係英姐十四日要返醫院覆診，如果醫生要佢留院做物理治療，隨時橫跨二十二日，無得出院。三人尋日話，至今未有官員接觸佢哋，游說出席投支持票，鬍鬚曾淨係掛住同黃師傅拉關係，政府超弱勢，係有原因嘅。