本文重點
合和實業主席胡應湘嘅公子胡文新（Thomas）出名係一個冰球癡，由佢一手創立嘅香港業餘冰球會喺本月三日至五日舉辦華人業餘冰球邀請賽，請嚟兩岸四地嘅冰球高手來港一較高下。
學咗冰球接近十年嘅Thomas本身都係箇中好手，不過佢呢幾日就只係齋睇波，冇落場露番兩手，Thomas話今次咁忍得手，原來係想畀多啲機會香港班冰球生力軍吸取實戰嘅經驗喎。
全副武裝頒獎
今次比賽分成人組同少年組進行，Thomas嘅母校華仁書院都有參加比賽，而且仲攞埋少年組冠軍。尋日着上球衣同溜冰鞋做頒獎嘉賓嘅Thomas，一頒完獎就攞住支球棒搵華仁班師弟合照，佢影相時仲不忘教路，提點師弟揸球棒時上身都要挺直啲。對於一眾師弟嘅表現，Thomas自是讚不絕口，佢覺得華仁書院隊訓練時間雖短，但合作無間，不過可能因為臨場經驗不足，所以隊形同組織依然欠奉。
Thomas喺推動本地冰球發展上一向諗頭多多，佢話香港嘅冰球隊缺乏實戰經驗，所以嚟緊會組織交流團，等本地冰球員有多啲出外比賽同集訓嘅機會。
卓妮