有留意改裝市場嘅車迷，一定認識Brabus呢個名字，呢間經常為平治（Mercedes-Benz）改裝嘅車廠，每次推出新改裝產品時，必定令大家感到無限驚喜，今次亦唔例外，廠方將SV12 R Biturbo 由750匹提升至800匹，極速350km/h，絕對係現時世界上最強嘅超級轎跑之一。
其實Brabus早前發布SV12 R Biturbo 750嗰陣，已經喺車壇引起哄動，當時唔少車迷都以為擁有750匹馬力嘅旗艦級轎跑，將會成為廠方嘅最強之作，點知事隔數月，Brabus嘅工程師就再度發功，推出更大馬力版本，真係高處未算高。
新一代Brabus SV12 R Biturbo 800，重頭戲必然係動力系統部分，廠方將原有嘅5.5公升V12引擎進行修改，以擴大汽缸、鍛造活塞、高性能曲軸、修改汽缸頭等部件強化方式，令到引擎容積一舉提升至6.3公升，馬力輸出達到800匹，峰值扭力喺電子系統限制下維持於112.2kgm。當引擎強化之後，究竟SV12 R Biturbo 800會有幾快？官方公布，0~100km/h竟只需3.9秒，加速至200km/h亦僅需7.9秒，極速更高達350km/h，成為世界上最快嘅豪華轎車之一，如果再將原有五前速手/自動波箱都進行強化嘅話，相信呢款超級轎跑嘅速度會更快！
除咗對引擎進行改裝之外，廠方更於新車裝上全新開發嘅雙渦輪增壓系統，並搭配四組中央冷卻器，同時又用上高性能排氣系統及運動化觸媒催化器等，務求令動力表現更強更勁。
除咗強悍嘅性能之外，SV12 R Biturbo 800嘅豪華程度更令人驚嘆。採用高級真皮與優質木製品裝飾打造座艙，帶來尊貴豪華嘅氣派。廠方又運用咗流動辦公室嘅設計概念，於車上裝上Mac mini電腦主機，15吋TFT屏幕、可連接iPad嘅藍芽鍵盤、無線滑鼠，同時全方位支援Apple產品，並且可以透過iBusiness（Brabus App），無時無刻收看Brabus嘅最新資訊，為每位老闆打造出專屬嘅辦公空間。此外，仲有頭枕螢幕及一部可收錄14,000首歌曲嘅64GB iPod touch，車主更可利用iPhone 嘅專屬介面，遙控操作Mercedes Comand娛樂系統，所有內裝配備更可以因應車主需要作改動，都咪話唔犀利喇！
撰文：賴以堅