Nikon D7000連拍追焦冇甩拖

好多人影相係為咗留住最重要的時刻，但有時出現失焦情況，諗住影個靚女，點知焦點去咗後面個叔叔度，真係咩心情都冇晒……如果你部相機係Nikon D7000，有3D追蹤及主體追蹤拍攝，就唔會出現此問題了；加上D7000連拍速度達到每秒6張，就算幾動感嘅畫面，都可以捕捉到最重要嘅瞬間啦！

連續影唔手軟

Nikon出完D3100冇幾耐，最近又獻新猷，D7000作為新系列的中階機，有着較高階的性能，機身體積亦與D90相近，拎上手甚輕巧，就算影寵物拎住長時間連拍亦唔會手軟。另外，此機採用EXPEED2影像處理器，按實快門連拍，可以每秒6張速度連續影100張相，就算影RAW都唔會影響連拍速度，配合用家的攝影觸覺，增加影到靚相的機會。想要裁相的話，只要以最大1,620像素拍攝，裁剩1/4都咁靚。

售價：$10,480（淨機身）、$12,880（連18~105mm鏡頭）

拍片自動追焦

機會瞬間即逝，影相拍片都一樣，最忌對錯焦，所以D7000就加入3D追蹤及主體追蹤功能，防止用家對錯焦。對焦點的數目會影響對焦的準確度，D7000有39個對焦點，仲可以進行3D追蹤，唔會鎖死一個對焦位，主角係咁郁都拍到清晰相片。拍片失焦仲嚴重過影相，可惜大部分相機拍片時都冇得鎖焦，此機就有主體追蹤功能，只要開啟全時間伺服自動對焦（AF-F），鎖定主角後按下「OK」，相機就會自動進行主體追蹤，畫面幾雜亂都能對準冇走失。

減省後製時間

影完靚相冇甩拖，都唔可以掉以輕心，後期工夫亦會影響一張相片的好壞，機內增設多種後期數碼濾鏡，即時將啱Feel效果加到相片上，創出個人新風格。除了新增魚眼、模型效果、色彩輪廓及彩色素描效果之外，每種效果都設有多種仔細的設定，例如不同強度、闊度等，減省於電腦後製的時間。節省後製的時間都有好多種方法，例如使用雙插卡，可將相片及短片放到不同的記憶卡內，甚至兩張卡的相片影片互相複製，將初步挑選的相片儲存到另一張卡，後期製作就能減省時間。

感光度可調校至ISO 6,400，最高可以擴展到ISO 25,600。	機頂有兩個模式轉盤，個人化模式設於轉盤下層。	方向鍵上方有紅色拍片鍵，並附有Live View變換桿。
數碼濾鏡內提供許多細緻設定，能製作出用家所需效果。	雙插卡設定，可以一張卡儲相，一張儲短片。	就連拍片都可進行主體追蹤，主角移向邊度都能對焦。