Gran Turismo 5辣跑3D狂飆！

等咗幾年，《Gran Turismo 5》終於推出啦，不過都由11月初延遲到年底。SCEH亦都已經開始為呢隻首次加入3D畫面嘅駕駛模擬大作造勢，搵嚟周秀娜、Melaine Z同郭思琳先嚟一場3D賽車比賽。講番個遊戲，除咗3D呢項新賣點，仲收錄過千款靚車，又加強天氣變化效果，更有實戰感覺！

3D鬥車零舍出色

《GT5》雖然仲有一段日子至推出，但係遊戲嘅3D效果，已令到3位靚女車手嘆為觀止。今次展出嘅3D版《GT5》Demo，比起東京遊戲展（TGS）時嘅版本收錄咗更多車款，仲可以玩到開發經年嘅馬德里街頭賽道（據講呢條賽道總共搞咗兩年先至完工），車輛同場景間嘅層次非常強烈，儀錶板更好似浮在半空一樣。但要玩3D版嘅先決條件係要有部3D電視，成本都唔平。

車身外形、物理變化，跟真車極相似外，外殼同內櫳像真程度都幾高。

天氣變化更像真

《GT》系列一向都係以收錄詳盡資料嘅真車做賣點，今集到目前為止已經收錄超過1,000個車款，好似有遊戲代言車款Mercedes-Benz SLS AMG、Ferrari 458 Italia同Lamborghini Gallardo LP560-4等，日日轉靚車已經唔係夢想；開發小組仲不斷加入新車，實數有幾多就要等推出時至知。今次仲同F1車隊Red Bull合作，在遊戲裏面開發出一架極速戰車X1 Prototype，時速超過450km/h，諗起都興奮。車身外殼、內櫳同物理反應都做得夠像真外，今集連天氣變化都做得更仔細，就如落雨、煙霧同日夜轉換嘅效果都好有真實感，臨場感十足。

影低愛車靚相

《GT5》玩法跟《GT4》雖冇特別大分別，但就製作得再認真一啲。遊戲設有可自己落場鬥車嘅A-Spec模式、轉做經理人嘅B-Spec模式，以及實時睇賽車轉播嘅Gran Turismo TV功能。愛錫戰車如老婆嘅玩家，仲可以透過升級嘅相片模式影低靚車同靚景，就好似拎住部單反咁，可以調校光圈、快門、焦距，像素更升級到800萬，影完仲可以同朋友分享靚相，如果可以影埋Chrissie、Melaine或思琳入鏡就更好啦！