車廂勤洗擦 衞生唔邋遢

打理皮座要勤力

現時唔少車款都採用多層式真皮座椅，提供更佳承托力，梗係坐得舒服啦！不過，想皮座歷久常新，保養方面就要注意。

其實打理真皮座椅比較花工夫，需要勤清理先可以保持新淨，事關空氣中嘅灰塵會被皮內嘅天然油脂所吸收，令皮質變得乾燥！

皮座最大嘅缺點就係易沾上油脂、汗水、灰塵等污漬，久而久之，就會令到皮座表面變得暗啞無光。如果唔係太污糟，用清水洗即可，千祈咪用高濃度化學清潔劑，亦唔好出盡力去擦，否則會傷害皮質！而對付陳年舊漬嘅最佳方法，最好使用皮座專用清潔劑，能夠有助起漬之餘，又可以軟化皮質，仲會形成保護層。此外，經常受陽光照射會令真皮容易老化及龜裂。

中控台清潔梗係唔少得啦！

得閒吸塵，車廂空氣都清新啲。

定期吸塵洗地氈

經常踩出踩入，地氈必然會污糟邋遢，泥塵日積月累，可能會成為病菌溫床，影響健康。而清潔嘅方法，最簡單就係將整張地氈拎出車外拍打，若然停泊位置有電掣，利用吸塵機就更加方便。

完成吸塵步驟之後，仲要徹底清洗一次，可以將整張地氈拎出嚟，再用一般清潔劑及毛刷去洗擦，或者使用汽車地氈專用嘅清潔劑。不過，完成清洗步驟之後，謹記地氈要乾透先好放回車廂，否則就會好易孳生霉菌，產生陣陣難聞嘅氣味！完成以上兩個步驟之後，仲未收得工架！事關車內好多位置經常被人忽略，好似軚環、波棍、手掣等經常會接觸到嘅位置，仲有錶板、門壁、內飾及尾箱都應該定期清潔o架！

清潔示範：1.先將適量清潔劑噴到門壁之上。	2.再用乾淨布輕輕抹拭。	3.右邊位置明顯回復光亮。
落車後用防曬擋遮蔭，可令皮製品避免受陽光照射而出現老化及龜裂情況。	有用法寶 Rinrei防塵防UV保護噴劑 備有防塵防UV功能，適用於錶板、門壁等皮革部分，連清潔輪胎、車燈表面都啱用架！售價：$65	Eagle One皮革清潔液 適用於車廂內所有皮革部分，具有起漬及防護功效，亦可以用於手袋及手套等皮製產品之上。售價：$58
AUG清潔紙巾 清潔錶板、軚環好幫手，只需輕輕一抹就能變得乾乾淨淨，相當方便。售價：$32	Eagle One皮座清潔劑 皮座易沾上油脂、汗水、灰塵等污漬，使用呢款產品即可清除，令皮面回復光澤。售價：$75	Carmate去污清潔劑 適用於車廂各部分，例如錶板、門壁、內飾位置，去污之餘，仲有防UV及除菌功能，連輪胎都啱用架！售價：$60

如何去除膠紙漬？

好多朋友都鍾意喺車頭錶台位置擺放公仔裝飾或香薰等物品，仲要用雙面膠紙黐得實一實，拎走啲物品時，可能留下難以清除嘅膠紙漬。坊間流傳用潤滑噴劑去清理，筆者試過之後，發現確實有效，不過會搞到油淋淋，又要用其他方法去清理，認真麻煩。另一個方法就係用白電油嚟抹，效果比前者好，而且超級快乾冇手尾。以上兩個方法都可行，但係同樣有缺點，就係分量過多可能會令錶板甩色，而且同樣係易燃物品，所以用嗰陣一定要小心呀！

Volkswagen Golf 1.4 TSI 真皮座椅夠舒適

Golf Ⅵ曾於紐約車展上獲得「2009全球最佳汽車」嘅美譽，其TSI引擎更連續三年獲得「全球最佳引擎大獎」。而屬於入門型號嘅1.4 TSI，擁有122bhp馬力及20.4kgm扭力，搭載七前速DSG雙離合器波箱，平均油耗只係$0.82/km。Golf 1.4 TSI車廂闊落舒適，而高承托力嘅真皮座椅為基本配備，豪華版嘅前座更設有發熱功能！

規格表

車型：五門五座位揭背車

引擎：直四渦輪增壓

容積：1,390c.c.

最大馬力：122bhp/5,000rpm

最大扭力：20.4kgm/1,500~4,000rpm

驅動：前置引擎、前輪驅動

傳動：七前速DSG雙離合器波箱

售價：$189,900（Trendline基本版）$213,900（Comfortline豪華版）

撰文：賴以堅

攝影：梁偉德、賴以堅　模特兒：Shannie（Inspire）

汽車查詢：Volkswagen HK（3698 9688）

產品查詢：2392 4244