前年一推出就大獲好評嘅《Star Wars: The Force Unleashed》，具電影感的流暢動作、細緻場景同巨型怪物，真係搞到唔少星戰粉絲晚晚煲通宵。事隔兩年Lucas Art添食出第2集，竟然將Starkiller這位主角翻生，究竟佢係點樣逃出魔掌？而拎兩把激光劍又有幾勁呢？
新作故事仍在《星戰》第3集與第4集之間，一開始就講Starkiller戰死後，畀黑武士複製再成為神秘學徒，變為新一代「噬星者」狩獵最後的絕地武士。任務結束後黑武士竟然嫌佢冇利用價值，仲落埋格殺令！充滿困惑的主角心中突然響起舊愛聲音，因此決定擺脫黑武士追擊，誓要查出自己真正身份，展開一段刺激的亡命之旅。
上集主角大多用原力隔空將敵人或物件拋來拋去，被圍時仲會用《無双》式儲氣彈開敵人，不過今集嘅原力系統得到強化，加進新力量Mind Trick蒙騙敵人思想，叫佢打自己友又得，叫佢自殺亦得，用嚟削弱敵方實力相當好用。而提升原力等級後，主角能力更可得到唔同程度強化，最正係面對啲大佬級敵人如黑武士時，主角原力會被怒氣所覆蓋，呢個時候就好似「龍珠變超西」一樣攻擊力同速度大幅提升，即刻勁晒！
為求做到逼真嘅場景，今集首次搭載Euphoria同Havok Physics系統，前者係模擬人體自然反應，令動作更人性化，即係被主角用原力震開啲白兵，佢哋識得打兩個觔斗「典吓」先死；而後者係模擬物件破碎效果，當瞄準機械人雙腳擲物件時，機械人唔會無端端四分五裂，而係先斷下身再塌上身。
除了用原力對付敵人外，主角還需要用原力去解謎，好彩今集隔空移動目標嘅精準度大幅提升，玩落更一氣呵成，加上主角換拎雙劍，比單手可使出更多連續技，用唔同招數仲會得到唔同積分，可以購買新招和裝備，所以大家斬怪時記得試多幾招喇！
類型：動作
開發：Lucas Art
平台：PS3、Xbox 360
推出日期：10月26日
售價：$399
查詢電話：2418 8896
撰文 ：廖俊斌