機戰主角古鐵火氣重

重型武裝突擊

其實「古鐵」（Alteisen）係德文Old Iron咁解，機戰OG故事入面機體設定為裝甲堅固嘅格鬥系機械人，有玩過呢隻遊戲應該記得，一開場地球聯邦政府，就係用外星隕石開發出「擁有絕對火力並能作正面突破」嘅人形機動兵器，去對付外星敵人。

合金足料墜手

見到古鐵咁笨重嘅機設時，小記同一眾粉絲都關注佢嘅活動能力，但玩上手又發覺佢重量同可動性做到恰如其分。首先古鐵嘅金屬位同上次鐵甲萬能俠差唔多，肩膀、腳腕同大腿關節用上合金，唔怕經常扭動而鬆脫或爆裂，再加上胸甲同樣都係金屬料，所以相當「墜手」。最驚喜係看似笨重嘅腿部全採用多重關節，配合腰股之間嘅球形關節，想擺出遊戲中聳肩、仰後、踏步等動作都靈活自如，超正！

畀佢招電熱刃劈中，真係渣都冇得剩。

唔好睇佢雙腿咁粗就以為可動性差，其實隻腳可以屈到上背脊，勁！

特效動作靈活

遊戲近身戰嘅全部招式，呢隻超合金古鐵幾乎做到足，無論左手三連機關炮開槍情景、方陣掃蕩炮全彈發射姿勢、右手轉輪貫釘上彈模樣，均一應俱全。最吸引係送埋火燄效果配件，套上右手即可重現發射狀態，而裝上頭頂獨角時更能感受到絕招電熱刃嘅威武形態，叫佢做「終極版古鐵」一啲都唔失禮。但要注意頭部獨角較長同比較脆弱，小心出招時扭斷隻角呀！

左手附有三連機關炮，造型相當細緻，手腕仲可做出90度屈曲。	右手嘅彈輪可轉出，不過子彈唔可以逐一拆出來，如果可以發射子彈更吸引。	肩關節可以作細幅度嘅前後扭動，腰股更加入球形關節令活動能力大大提升。
背部4個推進器可自由扭動，驟眼睇有點似高達。	轉輪貫釘插入爆發嘅效果相當有氣勢！	配件只有2件火燄特效部件同埋手掌替換，粉絲可能嫌太少吧。

撰文 ：廖俊斌

攝影 ：胡淑儀

查詢電話 ：2433 1828