節能駕駛切忌大腳油
油價高企令唔少車主叫苦連天，不過想為荷包着想，都唔係冇方法，事關大家仍可以用各種方法慳油。首先要改變浪費汽油嘅駕駛習慣，例如唔好隨便大腳踩油、咪放咁多非必需品，以及檢查車胎氣壓等等。以下慳油小貼士，不妨參考一下！
起步輕腳啲
有啲人鍾意起步時大腳踩油門起圍，呢個做法其實非常食油。所以，喺起步嗰陣，應該輕腳啲，又或者以扭力較大嘅低波起步；相反，若然喺行車加速嗰陣，應該盡早將低波轉為高波，咁就唔會咁嘥油啦！
此外，如果引擎能夠保持最佳狀態，咁就更加慳油喇！要做到呢一點，就需要經常檢查機油、油隔，以及風隔，如發現問題應立即維修及更換，呢個做法可以令汽油徹底燃燒，避免不必要嘅油耗。
車胎氣壓要注意
車胎氣壓不足亦係令汽車耗油量增加嘅主要因素之一，唔少車主都唔會特別走去油站或車房檢查胎壓，認為汽車「行得走得」就冇問題，咁搞法盞部車愈來愈嘥油。車胎氣壓太少會導致與地面摩擦增加，變相令汽車需要更多油去推進；而氣壓太多則會令行車唔夠穩定，影響安全。大家應依照車主手冊，打入適量胎氣！有啲車主會換大寸數嘅輪圈，雖然睇落確實係有型啲，但係同樣會增加耗油，更換之前認真要諗清楚呀！
適當運用冷氣
開冷氣會增加耗油量，適當運用自然更慳油，好似喺天氣較為涼快嘅日子，不妨以風扇取代冷氣，又或者將溫度調高一啲，甚至選擇開窗熄冷氣。不過，喺高速行車時，開大車窗會增加阻力，相反，關上車窗之後，情況就好似汽車裝上定風翼一樣，減低風阻。另一方面，停車時記得要熄匙，避免引擎空轉。
此外，盡量減輕負重對減低油耗都有好大幫助。有啲車主將物品放滿整個尾箱，此舉會增加車重，變相增加引擎負荷。如設有車頂行李架，冇用就應該將其拆去，以減輕負擔。若然大家能夠應用以上慳油小貼士，每個月自然慳番唔少！
慳油小車 首選Jazz
講到慳油車款，首推有型小車Honda Jazz Trio Passion ，具備1.3公升i-VTEC環保引擎配五前速加減自動波箱，一般行車狀態約2,000轉已足夠，平均油耗為5.4L/100km，每公里唔使一蚊，加上實用性極高，若然配合以上慳油小貼士，自然慳上加慳！
Honda Jazz Trio Passion 規格表
車型：五門五座位揭背車
引擎：直四i-VTEC
容積：1,339c.c.
最大馬力：100ps/6,000rpm
最大扭力：13.0kgm/4,800rpm
驅動：前置引擎、前輪驅動
傳動：五前速加減波箱
懸掛：（前）麥花臣、（後）扭力桿
制動：（前）透氣碟、（後）實心碟
售價：$169,880
撰文、攝影：賴以堅
模特兒：Elise（Inspire People）
汽車提供：合群汽車（2380 2231）