早前舉行嘅巴黎車展入面，法國車廠Citroën公布咗2011年全新改款四門揭背C4，一改以往嘅斯文形象，於車身上加入更多棱角線條，轉性玩硬朗風格。另外，為增強競爭力，廠方提供多種不同燃料引擎，包括汽油、柴油及LPG（液化石油氣），能源選擇如此有彈性，擺明車馬要進軍全世界。
據了解，喺巴黎車展之前，Citroën C4已於網絡上曝光，雖然新車唔算改到翻天覆地，不過外觀跟上一代車款已有好多唔同嘅地方。首先係運動化風格，明顯係承襲先前公布嘅DS High Rider概念車，將原本斯文嘅圓潤曲線全部刪去，以剛強嘅棱角線條所取代，尤其係車側兩條不對稱嘅腰線，肌肉感十足，增添幾分潮味！
除車頭大燈、鬼面罩及霧燈作出小量調整，全車最大改動就係車尾，尾燈由長方形改成不規則形狀，以及於尾泵把加入下擾流部件。而最新設計嘅C柱部分，於車尾營造出一個急速收窄嘅視覺效果。總括嚟講，新一代C4整體外觀變得更有跑味，當然呢個轉變亦係為咗市場需要。
此外，車身尺寸亦稍為增加至4,330×1,790×1,490mm（長×闊×高），行李箱空間則增加至408公升，比上一代C4多82公升，車身尺碼變大，不但為駕駛者及乘客提供更舒適寬敞嘅空間，同時又增加實用性，迎合各類車主需要。
動力系統方面，官方早前公布咗新一代C4將搭配3款汽油引擎與3款柴油引擎，另外追加一款LPG（液化石油氣）引擎。最大機會輸港嘅汽油版本，馬力最強為1.6公升引擎，搭配四前速自動波箱或五前速手動波箱，最大馬力120匹，備有Stop & Start系統，二氧化碳排放量可低至109g/km。另外仲有入門版本嘅1.4公升引擎配五前速手動波箱，能輸出最大95匹馬力。
未來C4亦會乘着環保趨勢，加入混能動力版本，附設前輪引擎、後輪馬達驅動嘅e-HDi設計，其二氧化碳排放量可進一步下降至99g/km。據官方公布資料，新一代C4已於全歐洲上市，至於會否到香港？咁大家就要拭目以待喇！
撰文：賴以堅