「籃球之神」米高佐敦復出？以47歲之齡打真正NBA比賽就真係有啲勉強，不過呢度講嘅係米高佐敦將會在新一集《NBA 2K11》復出，除咗擔任遊戲封面人物之外，仲會在10場經典賽事中現身，90年代嘅記憶一次過返晒嚟！遊戲收錄埋佐敦領軍嘅公牛隊，仲有得儲各代Air Jordan籃球鞋，2K Games呢鋪真係一次過去到盡！
其實有打開NBA遊戲嘅玩家，好多都已過檔玩《NBA 2K》系列，因為無論在遊戲真實感以至操控性都比同類遊戲優勝，唔使搞太多花臣都已經有大把人買。但今年2K Games唔知用咗幾多錢去買咗佐敦版權返嚟，單靠「籃球之神」個朵，就算平時唔打機嘅NBA迷，都好有可能買來收藏。
《NBA 2K11》最吸引嘅模式可說是「Jordan Challenge」，重返10場佐敦有份參與嘅經典賽事，例如有90年佐敦對騎士隊獨取69分嘅常規賽，同埋有97年總決賽第6場，佐敦帶病上場惡鬥爵士隊，十幾年前睇NBA直播嘅感覺返晒嚟！
打完10場經典戰役達成目標後，仲可以開啟「MJ: Creating a Legend」模式，玩法同上集引入嘅育成模式一樣，不過新模式只可以育成初出茅廬嘅米高佐敦，可唔可以將佐敦訓練成為超級巨星，就要睇吓大家嘅技術啦。
《NBA 2K11》既然有得用米高佐敦，冇理由唔預埋佢班好兄弟玩，所以遊戲仲收錄8支唔同年份嘅公牛隊，柏賓、古高同洛文都會現身傍住佐敦爭標。新作仲加入另一種「佐敦」元素，在達成某些里程碑時可得到Air Jordan籃球鞋，替球員穿上Air Jordan後仲會提升能力，但要儲齊咁多代嘅Air Jordan真係唔易。
除佐敦呢個賣點外，《NBA 2K11》嘅遊戲系統都作出唔少改良，比較明顯嘅改動係強化咗運球動作，帶波插花同換手時更加流暢，而且仲可以學佐敦帶波時做埋手勢指揮隊友，真實感大大提升。上籃動作都比以往多咗花款，仲有10款新射波動作，可以學足佐敦咁Fade Away跳射。
至於「My Player Mode」可以由選秀會開始訓練原創球員，爭取正選出場時間，如果打得好嘅話仲可以出席記者會，獲得巨額贊助同成為運動雜誌封面添，話唔定大家嘅原創球員會成為第二個佐敦呢！
類型：運動
開發：2K Games
平台：Xbox 360、PS3
推出日期：10月8日
售價：$379（Xbox 360）、$399（PS3）
查詢電話：2290 9333
撰文：布偉倫