南生圍港狗天堂

大家好！我叫番薯（波士頓犬），我跟其他港狗一樣，人見人愛，卻不是車見車載，平時甚少出街。今次，我有機會和主人到南生圍這個綠色天堂，還認識到我隔籬的Orion（讀作：餓Y人），都是因為主人參加了南生圍草原之旅。呢個團不但歡迎港狗參加，管接管送，包埋午餐，仲可以參觀農莊，學整茶粿、織草蜢，節目咁豐富，主人同我梗係爭住報名！

南生圍不僅是綠色天堂，亦是港狗的天堂。
（左）Orion（右）番薯

南生圍　夠野性

南生圍的風景是香港一絕。它被錦田河、山貝河所包圍，形成獨特的水鄉美景。錦田河河邊的紅樹林，吸引不少雀鳥棲息，大白鷺、小白鷺等十分常見，如果你好彩，更有機會見到瀕危鳥類—黑面琵鷺。而山貝河仍保留着古舊的橫水渡。艇家以人手操控長竹竿，駕着小船橫渡山貝河，船程不用1分鐘，每位盛惠5蚊。平貴與否見仁見智，但體驗卻是難得的。

另外，小村莊的石橋下，泥沼裏有不少招潮蟹和雙手蟹鑽出來，番薯我真係好想追住佢哋玩……穿過村莊，你會發現河塘、蘆葦叢、破屋，相映成趣，吸引好多人留影呢。

河塘風景咁靚，當然要同狗狗影番張相啦！

大草地喪跑勁玩

講到我最鍾意嘅，當然係在錦田河畔、有幾個足球場咁大的大草地，還有草地旁邊的尤加利樹林蔭大道啦。主人可以拖住我散步，或者畀我喪跑，瞓在草地上打轉，都一樣咁開心。

勁玩過後，肚仔餓，就到附近的有機農場吃農家菜兼遊花園。在這兒的農家菜，用自家種的有機蔬果入饌，例如：木瓜雞腳湯、蒜蓉蒸白茄子等，口味清新。食飽飽，我哋跟着「生態遊人」鍾先生來到農莊的蓮花池。蓮花池在陽光照耀下，波波粼粼，花兒朵朵，好靚啊。我哋仲可以坐上竹筏花間暢遊，好過癮。

泥沼上有不少得意的雙手蟹。	估估這是甚麼花？答案是熱情果花。	園主飼養的盾臂龜威威超過半米長。
乘坐竹筏在蓮花池兜一圈，真愜意。	蒜蓉蒸白茄子是筆者的至愛。