Ricky私房菜搬新竇 酒後無憂

食廈佔盡地利

就是Ricky的好手藝，令到2005年開業的Le Mieux Bistro，帶旺了柴灣的工業大廈，即使位置偏僻仍有大批捧場客，現在則「空降」灣仔街市內的食廈。

Ricky解釋搬竇原因：「以前大家去我餐廳，多數會揸車，但飲完酒其實又唔方便揸車，搬咗舖，食完飯坐車還有好多選擇，咁就可以盡情飲啦！」

Pertinace Mascato D'Asti 2007 $250 酒精度只有5.5%，這甜酒帶花香，可配搭不太Heavy的甜點。

Armand De Brignac Golden $3,280 這支「金香檳」大有來頭，曾勇奪2009年法國國際香檳大賽冠軍，質感平衡細緻，收結平均。

新舖約可容納40人，他說布置跟以前的不相似：「以前餐廳四四方方，裝修一致，而家就長方形，設計師仲特登分成不同部分，例如有白色小廳、黑色卡座及梳化座位等等，滿足唔同要求。」

龍蝦刺身及海膽配海鮮啫喱（晚市套餐菜式之一） 這頭盤鮮甜無比，最頂的是大瓣海膽及波士頓龍蝦刺身，加點日本青檸皮，清香獨特；底層啫喱則是由蝦、蟹、龍蝦及魚等熬成凍湯後再混合魚膠而成，質感清爽。	烤慢煮乳鴿（晚市套餐菜式之一） 乳鴿以八角、果皮、甘筍、洋葱及香料等熬製的上湯浸熟，然後經煎、烤的步驟，火候恰到好處，鴿肉鮮嫩無比，展現了Ricky在傳統烹調中帶點Asian Touch，是他的拿手菜之一。	檸檬蜜糖奶凍（午市套餐甜品） Ricky控制材料分量出色，令奶凍軟身滑溜，還加入點點檸檬皮及蜜糖，調和甜酸度；自家製的無花果雪糕口味獨特。

精選當造食材

雖然搬了舖，但食物仍保留一貫私房菜的模式，最開心的是水準依然，價錢不變，即係畀柴灣價歎到灣仔菜，四道菜午市套餐分別有$140及$280兩款，而六道菜晚餐則每位$680，並保留多款招牌菜如法國鵪鶉、煎鯧魚及黑松露清湯等，教粉絲們興奮。

燒牛肉 $140（午市套餐菜式之一） 美國安格斯牛肉以低溫烹調，入口出奇嫩滑，特別一提伴碟的番茄，帶有原汁原味，酸酸的又帶點甜味，瀰漫果香。	San Daniele Ham配溏心蛋沙律 $140（午市套餐菜式之一） 這火腿比Parma Ham油潤軟綿，配上半熟的溏心蛋及BB菠菜，特別湊成花形賣相，未食已傾心。	張錦祥 Ricky Cheung 十多歲便入行，烹飪經驗豐富，為萬麗海景酒店Scala餐廳的前行政總廚，於2005年起主理Le Mieux Bistro至今，逢星期日更會在電台開咪講飲講食。

精選時令食材煮餸的Ricky表示：「我最愛簡單煮法，因為食物原味會更突出，原汁原味。」現在一年四季都有美食供應，更令人懷念一期一會的興奮，所以會不時見他選用當造的蠔及松露等入饌。

飲得喜推介

若你跟Ricky一樣，喜歡飲番杯的話，來這裏定會相當興奮。藏酒逾兩百種，包括餐酒、香檳等，更不乏靚酒如Talbot及Lynch Bages等，售價比市面便宜，有些更平上一半，好抵飲！

試食報告

環境氣氛：****

好味指數：****

必食推介：龍蝦刺身及海膽配海鮮啫喱、燒牛肉

人均消費：$300（午市）$800（晚市）

小記飯後感：「龍蝦刺身及海膽配海鮮啫喱充滿鮮味，感覺如置身海洋；而燒牛肉好嫩滑，一洗『柴皮』鞋口的壞印象。」