iPhone當啞鈴叮走Bye Bye肉

iFitness逐步示範健身

不少人Keep Fit都會去做Gym，不過健身室咁多唔同類型嘅器械，玩法、功用樣樣唔同，搞到唔少人一頭霧水。《iFitness》就為經常做Gym嘅各位而設計，內置數百種練習，仲有齊附圖解說，部分練習更附設影片，等你可以跟住Step by Step玩健身。大家更可根據自己喜好揀選想鍛煉嘅部位，仲可記錄進度，健身就更有效率啦！

售價：1.99美元

大隻佬真人示範點舉健身器械，夠晒說服力！

攞住iPhone看圖跟住指示做伸展，簡單過癮。

（折約港幣$15.5）

Fit For Rhythm學Wii做運動

女士們如果想Keep Fit，但係又唔想買啞鈴嘅話，不妨下載《Fit For Rhythm》。佢唔單止介面風格似足Wii，連玩法都跟到十足，內置多種健身運動，包括伸展、平衡等，只要用家當iPhone係啞鈴，跟住指示咁Fing，iPhone就會感應到你嘅動作而記錄低運動成果。小記試玩「Chest Stretch」要做30次胸部伸展，完成後Show埋卡路里畀你睇，夠過癮！

售價：免費

All-in YOGA 學瑜伽不求人

前排瑜伽教室開到成行成市，事實上源於印度嘅瑜伽，可透過不同動作和呼吸改善身體狀況，甚得女士們歡迎。《All-in YOGA》便提供逾200個瑜伽姿勢，並附有圖片、文字以及影片解說，跟足指示輕易上手！佢最貼心係將不同動作分成4種難度，方便大家根據自己的進度練習，用家還可輸入體重、年齡及目標，讓程式幫你揀合適嘅

動作。

售價：1.99美金（折約港幣$15.5）

Office Yoga 辦公室做伸展

OL朝九晚五坐Office，好易坐到有肚腩，而且坐得多周時腰痠背痛，想坐得健康啲，咁就要單撈《Office Yoga》喇！唔好以為佢係講瑜伽，其實《Office Yoga》以漫畫形式，教大家伸展運動及健康小貼士。最搞笑嘅地方係佢教大家點樣利用辦公室器材，包括影印機、𨋢口、辦公椅、辦公桌上做伸展，絕對適合長坐Office嘅朋友！

售價：免費

Calorie Counter by MyNetDiary 追蹤卡路里

小記身邊有不少女性朋友成日計住食物卡路里，話可以有效控制體重和脂肪。如果你身邊都有類似嘅朋友，定要推介佢用《Calorie Counter by MyNetDiary》。佢可以幫你計算日常攝取的卡路里，仲有食物資料庫畀你計算一日三餐的卡路里，還可用Barcode尋找食物資料，咁就冇咁易超標啦！此外，軟件仲可協助你分析飲食習慣，令Keep Fit更容易！

售價：免費

Sleep Cycle alarm clock 分析睡眠狀態

都市人生活壓力大，時不時會瞓得唔好，尤其女士們失眠個樣實殘爆！《Sleep Cycle alarm clock》就可以記錄你嘅睡眠狀態，仲有圖表分析埋畀你睇，發夢定熟睡就一目了然。而且程式有一個非一般嘅響鬧功能，會以特別的聲音喚醒你，等用家可以用一個更自然的方法起身，用咗佢話唔定可以一覺瞓到天光呢！

售價：0.99美金

（折約港幣$7.7）

撰文 ：林子聰　攝影 ：郭凱敏　模特兒 ：Albee（大紅大紫）