LG世界初Full LED 3D TV千萬比一睇得出色

LG早兩日請了一班亞洲傳媒飛去韓國總壇，當然有重大發布，就係率先預覽即將推出的Infinia LX9500 3D電視！自從今年CES展覽短暫曝光後，網上流傳過不少有關此機的資料，依家話畀大家知有幾勁：機身只得22.3mm薄、邊框亦窄到得16mm，但對比度高到10,000,000:1，勁誇張！LX9500用上Full LED Local Dimming技術，畫面夠立體之外，層次感又高，仲係世界上第一款Full LED 3D TV，都幾巴閉！

LX9500邊框特幼只得16mm闊，加上Uni-Layer設計，效果出色。

22.3mm薄機身

LG總部設在首爾汝矣島的雙子星大樓，不過要睇LX9500真身，就要去到京畿道平澤市（Pyeongtaek-si）研究發展中心。Inifinia系列電視設計同去年底的Borderless系列一脈相承，用上Uni-Layer單層設計、更薄的22.3mm機身厚度以及更窄的16mm邊框去提升美感，另外，再加上3D顯示能力及無線接駁享受多媒體內容，換句話即係內、外在美兼備。LG看似較遲先正式公布3D電視的詳細規格，但其實係為了樣樣都比對手更好，例如可視距離達7米，比對手多達1米；可視角度120度，又比對手多20度；甚至Active Shutter制式3D眼鏡的充電時間又快些，操作時間又長些。

TruMotion 400Hz技術 3D畫面順滑

LX9500比其他電視更強的地方還有新研發的TruMotion 400Hz技術。現行好多LCD電視（包括3D電視）都只得200Hz，播高速移動的2D畫面係足夠，不過換轉成3D畫面就唔同講法。LG工作人員列晒表話200Hz顯示技術只係夠播到950線高質3D畫面，要播到最靚的Full HD 1,080p 3D畫面，就要400Hz先夠。即場所見幾條3D試片當中，德國拍攝的賽車片段就最能感受到當中細緻又順滑的3D畫面，抵讚。

LX9500的Active Shutter 3D眼鏡已經有晒型號同包裝盒，名為AG-S100，全黑設計。

LX9500的Active Shutter 3D眼鏡已經有晒型號同包裝盒，名為AG-S100，全黑設計。

放大圖片

Full LED Local Dimming 提升對比度

至於Full LED Local Dimming技術，即由以往一大塊LED背光燈改為極多個可獨立操控的LED背光區域，首輪推出的55吋型號便放入了1,200盞LED燈，所以對比度可以推高到極誇張的10,000,000:1，層次感出晒嚟。LG資料話第二季會加入2D轉3D即時轉換功能，好大機會LX9500一出已有，不過更吸引係電視機會直接支援多種3D格式，例如Fujifilm之前部3D數碼相機，唔怪得現場見到LG員工用部FinePix W1係咁影相啦。大家幾時先可在香港睇到LX9500？新電視先於5月初在韓國推出，然後就到歐美及其他重要市場，照推論好快會引入香港，希望世界盃前有貨啦！

從側面睇，更可見LX9500有幾薄。	除主打LX9500外，Infinia系列仲有另一主打LE9500（右下），規格相近，外形設計都差唔多。	新Infinia系列電視在韓國已引入這種選台介面，不過可唔可照搬到香港就要再研究。
用上Borderless式設計，另備TruMotion 400Hz（480Hz）技術。	LX9500採用最左邊的Full LED Slim技術，可將對比度提升到10,000,00:1。

LG Bestshop旗艦店遊記

一場嚟到首爾，當然要去LG Bestshop專賣店的旗艦店參觀。旗艦店的正式地址實在講唔出，但佔地好大，門外仲有露天停車場；裏面則見到一系列LG平面電視，主打係早前推出的47吋被動式3D LCD TV 47LH5030D，仲有部據講將會到港的復古設計Slim CRT電視仔，Design味濃！專賣店有齊LG電視機、手機、顯示屏、手提電腦同家電外，其實相機、MP3機、字典機等Corner都有賣其他牌子產品，但當然搵唔到S品牌啦！