惠英紅藏柔情渴望愛

惠英紅於八十年代走紅，當年擁o靚模樣貌及身材的她，機緣巧合下成為打女，為了展示鮮有表露的女性嫵媚，她自資拍攝全裸寫真集，比人氣o靚模Angelababy更早到巴黎取景，而且比o靚模更大膽，她說：「寫真喺日本翻譯係指靚相，個個出世都係冇着衫架啦，攝影師同場景配合，只要影出嚟意識健康原始就可以，而且當年有肌肉，係健美小姐嘅身形，嗰時想青春留倩影，覺得廿七歲最適合，驚呢一刻唔影再冇機會。」

嚴重抑鬱自殺

惠英紅不僅勇敢地豁出去，還斗膽瞞着媽媽：「當時媽媽唔知，佢好關心我，但冇可能管到我，佢到依家都未必知，兄弟姊妹冇過問，但姊妹睇過都讚靚。」

別被惠英紅的剛烈外表欺騙，她亦有脆弱的時候，大約四十歲那年她患上嚴重的抑鬱症，拉鋸四年多，心力交瘁：「差唔多十年前，我患上嚴重抑鬱症，當時係屋企人發現我有問題，我試過自殺，係屋企人救番我。朋友同屋企人成日陪住我，帶我去睇醫生，依家好番晒啦！」

惠英紅的演藝生涯一直風平浪靜，直至患上抑鬱症，將她徹底打沉。「我做過好多女主角，喺工作上唔算浮沉，係有病嗰幾年低沉過，事件擾攘咗差唔多四年，依家諗番轉頭，好似發咗場夢！」她說。

天生樂觀的惠英紅，終於走出抑鬱症陰霾，更學懂用另一個角度去看當年的低沉期，她說：「喺電影《心魔》，我要扮演一個有少少精神病嘅媽媽，我就將當時患病嘅情緒投入去，加上我媽媽有『戀我狂』，依家都會極度控制我，叫我幾時要沖涼，就算我凌晨一點幾返到去話食咗飯，佢都會喺床度跳起身話整嘢畀我食。我就用呢啲『經驗』去演繹角色，所以特別入型入格。」

日日捧住個獎

惠英紅憑《心魔》先奪台灣金馬獎「最佳女配角」，月前再下一城，在香港電影評論贏得「最佳女演員」，令她對下月舉行的香港金像獎影后寶座更有信心，她坦言對此獎虎視眈眈，希望得獎令事業更圓滿：「恨攞架！我攞過第一屆香港電影金像獎女主角，今年第廿九屆，等咗廿幾年終於再有提名，係入行三十一年零兩個月嘅紀念，證明我未被淘汰，仍然有人認同，好有意義。」

為了攞獎，惠英紅出盡法寶，她自爆：「去年有位高人同我講，『馬』好旺我，咁啱我攞台灣『金馬獎』之前就係同無綫的馬德鐘、馬國明和馬浚偉見過面，非常巧合，依家個『金馬獎』放喺床頭，馬頭對住我，我日日都會捧住個獎，希望佢可以帶挈我繼續攞獎，我係有啲迷信，會袋住馬形嘅飾物催旺自己，只係冇時間入馬場。」

近年事業再創高峰，情場卻交白卷，入行逾三十年唯一承認的男友只有藝人黃子揚，「零」緋聞的她坦言渴望得到愛情滋潤：「空白咗好多年喇！有師傅批我下年會派利是，希望真係啦！依家連烏蠅曱甴都冇呀！都想有個男伴，但識到至得架，係好渴望。」

黎耀祥好男人

曾與不少男星合作的她，始終未遇上真命天子，但原來她心目中早有人選：「我覺得黎耀祥同王賢誌都係好男人，我同黎耀祥十幾年前合作過，早前同佢講笑話：『早知嗰時就執咗你啦！』」武功了得的她卻要求另一半不要有此共同嗜好，她認真地說：「我鍾意嘅男士要顧家、純品、堅定，唔好咁易受到引誘，最怕係武夫，一定要有內涵，自己讀得書少，想搵個有學識嘅男人做伴。」

踩周秀娜意識不良

惠英紅早在八十年代已推出全裸寫真，大膽程度遠超新一代性感icon周秀娜，惠英紅強調意識是最重要，對於刻下走性感路線的女藝人，她有何評價呢？

周秀娜

周秀娜去年推出爆乳寫真集，成為一時佳話，連惠英紅亦被她吸引：「我有睇過佢滴牙膏、食雪糕啲相，我有買到，都想睇吓佢影成點。佢始終係新人，唔知係公司想佢咁行，定係佢自己想咁，相信佢未必想係咁，成件事喺意識上唔係最好。」

高海寧、梁政珏

高海寧及梁政珏是無綫的「咪神」，惠英紅亦有留意兩人：「兩個都未合作過，性感唔係問題，但係會唔會因為性感而紅就好難講，視乎觀眾，亦都好睇運氣。」

高海寧有新一代「咪神」之稱。

梁政珏近期轉走性感路線，人氣隨之急升。

文：專案組

場地及服裝：ESCADA