高海寧天生「咪咪」偉大過人，雖然落選港姐，不過在娛圈生存跟選美是兩碼子的事，看看同屆冠軍張舒雅去了哪裏？就知道「咪咪」才是高海寧的後着，就像唸起魔法「咪咪咪咪胸」一樣，為她變出無限的星途，更希望繼舒淇之後憑演技成為新一代性感女神！

08年落選港姐高海寧在參選期間已憑34D巨咪成為風頭躉，可惜是非新聞多多，一時傳她是大話精，一時又被爆影半裸照，最後名落孫山，只分得一個「旅遊大使」的豬肉獎。她說：「輸咗冇唔開心，反而鬆一口氣，因為參選期間壓力好大，我唔係講大話，只係當時好驚，試過有七架狗仔隊車泊喺屋企樓下，又成日偷影我父母，搞到媽咪瘦咗成廿磅，塊面都凹晒，真係好擔心。」

任人擺布　唔敢say no

她承認入行前拍過一輯半裸照片，令她歉疚不已，並寄語一班o靚模要帶眼識人：「我第一份工就係做part time model，公司介紹我幫一間髮型屋拍Collection Book，去到都唔知要影露背相，又唔識得推。當時只有18歲，唔識保護自己，淨係識答『好啦！好啦！』只求盡量唔好走光，但無諗過後果會咁嚴重，會影響以後條路！（有冇遇過茅山師傅教你性交轉運？）呢件事太離譜嘞！我都唔信呢啲事。」

胸戰JC 化敵為友

高海寧經歷多了，人也學得精乖，難怪入行年幾已成為無綫力捧小花。去年底以真材實料的「自然胸」升呢成為「咪神」徐淑敏的接班人，力撼同樣上位的「警鐘胸」Jessica C.，並展開連場激戰。她笑說：「我覺得Jessica C.好靚女，身材又好，但大家只係良性競爭，希望將來可以做朋友。」不過，高海寧亦不得不承認激凸身材令她易上位：「人對人嘅第一個印象都係畀一啲嘢吸引，之後先會留意其他嘢。尤其呢行外表好重要，人人都鍾意睇靚嘢，但我知道淨係得外表唔得，長遠都想收斂吓（身材），依家努力磨練好演技，等觀眾睇到我內在美。」

番薯減肥 食之無味

高海寧的「封胸」宣言未免嚇窒不少宅男，但市場既然有需要，又何需急於一時，新一年導演王晶已先拔頭籌，揚言會起用「令人產生性幻想」的高海寧拍攝新片《潮性辦公室》，看來「封胸」之路要暫緩一下。她笑說：「哈哈，衷心多謝晶哥咁畀面同欣賞。（有冇諗過突破吓，作大膽演出？）其實晶哥捧出嚟嘅女星都唔一定係着得好暴露，有時只係感覺性感，好似林熙蕾、邱淑貞、舒淇，舉手投足都散發性感味道，呢啲先係真正嘅性感女神。」

她直認自己仍未達標準：「如果我係普通人，我會好滿足自己身材，但因為要上鏡，天生樣子同身形都比較圓潤，個幾月前我已開始每日食蒸番薯，瘦咗近十磅，雖然已見成績，但仲要減多少少。」

結交男友　父母幫手

在娛樂圈要捱出頭絕對不是一件易事，高海寧直言初入行時亦需要媽咪「接濟」，提起屋企人她肉緊地說：「好多謝屋企人一直以嚟喺精神同金錢上都好支持我，依家搵到啲就會全部畀晒媽咪，我怕自己大使儲唔到錢，媽咪理財叻啲。」她表示永遠把屋企人排在第一位，就連揀男友亦要先過父母一關，她解釋：「由細到大父母都會提我呢個男仔點點點，最後一一兌現，所以我好尊重，如果佢哋見過話唔鍾意，我會即刻飛咗佢，唔想令屋企人唔開心。」

早前有傳陳倩揚做媒介紹一位高大猛男予高海寧，問到有沒有發展可能？她邊笑邊賣關子說：「唔知架？將來嘅嘢係唔知，大家係朋友當然仲有聯絡。（會唔會學徐淑敏玩閃電結婚？）蘇師傅（蘇民峰）話我呢幾年真姻緣未到，要過多幾年，但一定嫁得出。」

後記：但願錢長有

高海寧強調自己不貪錢，只要身邊男人錫她，錢夠使夠用已足夠。談論這話題時，與她同一經理人的梁烈唯（唯唯）和黎國輝（阿感）亦在場，唯唯不期然問她怎樣才算夠使？高海寧好認真解釋：「錢係要有，但唔使太多，起碼要衣食住行無憂，最好係使表面嗰『浸』，唔好今日買完嘢，聽日要捱麵包。」兩位男士即點頭互望說：「哦，即係幾億同幾十億都一樣，但都係要有錢……。」

文：專案組

攝：吳文聰

髮型：Ethan Ng @ Hair

服裝及場地：Aarrogant Cat