大市昨日如坐過山車，上周五華爾街三大指數做好，港股昨高開13點後，很快輾轉往下，未到十點半，在內銀偏軟拖累下，最多跌過465點落到28,137點。不過，騰訊（00700）由即市低位挾高15元的帶動下，恒指十一點後已逐步收復失地，尾市曾倒升47點，最終收市僅跌6點報28,596點。
沒有騰訊幫助，國指跌77點收報11,524點，即市V形走勢，推動主板成交增至1,117億元。另外，A股拗腰回升亦係支撐港股低位反彈原因之一，滬綜指由最多跌15點到尾市高收，升16點收報3,388點，10日線失而復得，有成功試底，搵到短期支持迹象。
本欄講過，恒指走唔出28,100至28,650點的上落區，講乜都假，昨日的V形殺倉，如有重倉在手，稍為缺乏定力的相信已經被震走出局。
昨日恒指即市低位28,137點，幾乎觸及50日線28,107點，以向上倒轉錘收高，確認28,100點附近的支持，對短期後市有利。大家唔爭在等28,650甚至28,798點確認突破才開倉，如果十月的上落區悶局結束，後市應該大把水位，唔使心急。
John Mullen