絲絲講場：4個投資誤區 阻你發達
有研究指出，現實中有能力影響他人方向嘅人僅佔5%，其餘95%嘅人普遍係跟大圍，甚至係實際發生緊咩事都未知。雖則跟主流未必有問題，但以下4個投資方向，若然「人做你又做」，有機會令你後悔半生！
1. 買樓綁住大部分資金
上車？人人講又人人趕，有咩問題？買樓意味着要動用好大筆錢，大部分資金被綁住，必然阻礙你作其他投資。若傾盡家當置業，不幸遇上經濟逆轉，樓價大跌，你自問有無能力應付先？
唔好以「自住」兩個字來將自己未計得清嗰條數合理化，買樓來收租先可稱得上係投資。
2. 冇投資自己損失重大
買股有機會蝕，買樓亦可能變負資產，唯獨投資自己係「必贏」，連股神巴菲特曾講過「最好嘅投資就係投資自己」！所以，首要將錢同時間用於增廣自己嘅知識技能，裝備自己先係王道。
3. 分得太散容易出事
股神巴菲特及微軟創辦人蓋茨皆認為，致勝秘訣在於「專注」！有錢人睇準個籃，就將所有蛋放喺嗰個籃度，然後盡力保護好個籃。冇錯，係要講分散投資，但分得太散閣下顧唔掂咁多，就變成太花心，唔係個個花心得起，小心有後果。
4. 孭債讀大學未必賺硬
讀大學可以增進知識，但唔保證你日後賺大錢。所以，唔好迷信「讀大學令人成功」，讀大學只係其中一個選擇。如果你有明確目標，而個目標又根本唔需要一個學位來實踐，咁何必背負幾十萬元Grant Loan，阻礙你嘅發展或創業大計呢？
余絲韻