絲絲講場：新股上市第二代上陣

孫主席有逾四十年家庭醫學服務經驗，佢位公子Michael今年37歲，係放射科專科醫生，Michael話細細個受爸爸影響已想做醫生，覺得醫生可以幫到人。

聯合父子兩代皆醫生

咁Michael想唔想下一代都做埋醫生呢？Sorry，絲絲可能問得太直接，Michael少少尷尷尬尬話：「睇佢哋個人Preference啦」。咁爺爺孫主席點睇？爺爺話，唔限住個孫一定要做醫生，事關佢哋先得5、7歲，要睇佢哋興趣、能力同埋機會，爺爺仲話「Hong Kong U （醫科）好難入，Full Mark先入到」。

公司上市後，孫主席仲睇唔睇症？佢話點都會留三分之一時間睇症，事關睇開佢嘅病人已經睇到帶埋孫仔嚟睇佢，佢好享受同病人一齊嘅時間咁話。唔單止港企，內地民企一樣一、二代拍住上。本周五上市嘅福建零食王達利食品（03799），主席許世輝位32歲千金許陽陽，就係公司執董兼副總裁。

達利福萊特千金亮相

至於尋日開始招股嘅福萊特玻璃（06865），佢哋主席阮洪良位28歲千金阮澤雲（Michelle），就係公司財務總監，五年前已經入公司管數，佢話好細嗰就跟阿爸阿媽返公司，所以公司算係佢「成長伴侶」。嗱不過，Michelle其實己經有咗人生伴侶，就係丈夫趙曉非，亦即係集團副總經理。

講開又講，絲絲見到啲零頭數字，硬是覺似有密碼咁。尋日聯合醫務個招股入場費係4,444.34元，「一生唔死」？絕非「九死一生」，定價嘅嘢，百無禁忌。

余絲韻