為咗創業，可以去到幾盡？呢方面，聽講內地大學生一畢業就諗創業，比香港嘅狂熱好多，絲絲聽阿里前總裁兼首席營運官關明生（Savio）係咁講。
Savio依家主要幫內地中小企做諮詢，時不時都會有啲想創業嘅年輕人搵佢傾吓咁。有次，有位北京年輕人想問吓Savio意見，仲約好咗一個星期五由北京飛嚟香港見Savio，見完就即日飛返北京。對方話當日搭三點半機，Savio當時預咗對方六點半到香港，可以食晚飯傾，食完對方就飛返北京。
點知，對方嘅狂熱程度勁到Savio覺得「不可思議」，事關呢位「狂熱分子」搭嗰班機，無錯係三點半，不過係凌晨三點半，即是晨早六點幾就到香港，「狂熱分子」原來係預算同Savio一路傾到傍晚先走，即係諗住傾足12粒鐘。
Savio見佢咁有心就陪佢一齊狂熱，Savio自己專登早一日去機場酒店瞓一晚，晨早六點幾就可以同「狂熱分子」食早餐，一路傾到飽。
咁Savio覺得佢生命中最創新嘅嘢係咩？竟然係即食麵！加熱水就可以解決到一餐好勁。不過佢話「昨日嘅創新，就係今日嘅常規」，所以好多嘢唔可停喺度o架。
余絲韻