絲絲講場：法巴郭小菱 靜待「小龍女」
邊個父母唔想子女成為人中龍鳳、光宗耀祖？咁啱龍年在即，唔少父母自然都希望生番個「龍仔」、「龍女」，咁就可以名正言順望子成龍嘛！而喺窩輪界都有生B喜事，原來法巴上市衍生產品部董事郭小菱（Shirley）已懷有「小龍女」5個幾月，預產期係今年五月，真係可喜可賀呀。
BB足5周即訂床位
Shirley同絲絲講，自己有咗BB約5個幾禮拜嘅時候，就「拿拿臨」趕去醫院交按金訂床位，嗰日仲要係打緊八號風球，夠晒難忘，但朋友話已經算遲，若再遲啲就隨時連位都冇呀。咁又係，龍年之後就係蛇年，為咗好意頭，大家都希望今年添丁，加上咁多「雙非」內地人硬闖急症室生仔，生B床位就梗係爆到爆燈。
Shirley話，唔係刻意揀龍年生B，係咁啱啫，並笑言生女好，女仔比較聽教聽話呀。Shirley嘅同事、法巴上市衍生產品部聯席董事趙海珠（Alison）更半開玩笑補充，原來生B都同窩輪投資有啲似，就係要好好計劃部署呢！絲絲記得Shirley已有一隻又肥又可愛嘅愛犬Cotton仔仔，遲啲加埋「小龍女」，真係熱鬧非常。