所謂為善最樂，喺去年七月做老竇、「一索三男B」嘅恒地（00012）副主席李家傑似乎深明此道，並且對內地嘅貧苦兒童顯得特別關愛。去年八月華夏基金舉辦嘅慈善晚會，李家傑慷慨解囊捐款1,000萬元，華夏基金會為表謝意，專登喺今晚正式舉辦捐贈儀式，並會詳細公布有關捐款嘅用途。
其實李家傑與華夏基金會嘅關係非常密切，佢係基金會嘅名譽委員兼信託委員會委員，華夏基金主要支持內地貧困山區嘅職業教育以及衞生事業，為貧困地區提供無償嘅項目資助。
李家傑已經唔係第一次透過華夏基金會做善事，喺去年四月，佢就曾經藉個人名義成立嘅「李家傑珍惜生命基金」，聯同華夏慈善基金喺內地西北地區開展「愛佑童心」計劃，為寧夏、陝西、甘肅多個省份嘅先天性心臟病兒童提供免費手術治療，李家傑唔單止捐錢，並且親身到上述地區做探訪，可謂身體力行。
余絲韻