「魔童」王維基（Ricky）專心做電視大亨，完全放棄電訊業務，都算係技驚四座。早前佢話呢個決定係受哈佛大學哲學教授Michael Sandel寫嘅《正義──一場思辨之旅》呢本書所啟發，尋日佢再講古仔，話亦都係受一位著名外國電影人Scott Neeson嘅影響。
呢位「前電影大亨」Scott Neeson某次放假去柬埔寨，臨上機前遇上拾荒兒童，呢次經歷唔單止令佢辭咗份工，仲賣晒物業去柬埔寨開設孤兒院，Scott Neeson○四年更創辦咗柬埔寨兒童基金會（CCF）。
王維基就話，今年自己五十歲，所謂「五十而知天命」，加上舊年底率領一眾公司員工接受柬埔寨嘅「洗禮」，就有所感知要賣咗電訊業務，講到明依家創業最大動力唔再係為經濟，只希望為本港創意出力。為咗鼓勵年輕人嘅創意思維，佢就覺得香港電視係創意行業好重要嘅基石。
王維基尋日係出席安永嘅「企業家成功之道」論壇，同場仲有同佢「交情非淺」嘅香港總商會總裁袁莎妮，佢哋雖然同枱食飯，兼且同台影大合照，但就各自修行，冇乜交流喎。
余詩韻