湖人3加時至搞掂鳳凰城
誓保西岸二號種子嘅湖人，尋日面對鳳凰城太陽可謂「攞苦嚟辛」，事關「紫金兵團」一度大幅領先21分下，被客隊狂追分逼至加時。幸而湖人經過三節加時後，最終亦能以139比137贏波，取得近14場常規賽第13場勝仗。高比拜仁今場交出42分及12個籃板，但遺憾差1次助攻而未能食出大三元。
湖人今場差點大意失荊州，事關呢支衞冕總冠軍在第三節不夠5分鐘時，已領先鳳凰城達21分，殊不知略為鬆懈即被客隊連番追分，尤其係鳳凰城幾位三分好手都射到着晒火，最終格蘭希爾射入三分球逼至112平手進入加時。湖人本應在首節加時已解決對手，可惜奧當竟在最後1秒鹵莽侵犯菲爾，讓後者連入3個罰球再度追平。湖人最終要戰至第三節加時，先憑高比拜仁在最後關頭跳投得手鎖定勝局，險勝139比137。
奧當攰到想返屋企大覺瞓
高比仔為湖人貢獻42分、12個籃板及9次助攻，只差1次助攻就能奪得「三雙」，高比仔上一次單場獲得「40+」得分及「10+」籃板，已要追溯到09年12月。代替拜林出任正選嘅奧當，亦奪得個人今季新高29分及16個籃板，佢賽後就話打足七節賽事好辛苦，好想立即返屋企瞓覺！
湖人最近走勢凌厲，近14場賽事贏咗13場，總成績為51勝20負，已領先第三位嘅小牛1.5場勝仗，緊守西岸二哥位置。至於輸波嘅鳳凰城形勢較為嚴峻，現時落後西岸第八嘅灰熊3場勝仗，想趕搭季後賽尾班車有難度。
本報綜合報道