喺尋日中視金橋（00623）嘅業績會上，主席陳新回答地震問題時顯得特別傷感，細問之下，先知道原來佢以前係做記者，佢話做記者有種使命感，如果依家仲係記者，即使面對輻射危險都一定會去現場採訪，佢覺得無論係工作需要抑或使命感使然，幫助災民都係義不容辭。
陳主席回想自己做記者嘅時候，冇遇過好似日本地震咁大嘅災難，最大單嗰次係九八年長江洪災，當時雖然未有去最前線採訪，只留喺新聞總部做指揮工作，但要即時作出適當指令畀前線人員，情況都好緊張，嗰段時間佢喺公司以櫈作床瞓覺足足成個月。
既然咁鍾意記者呢份工，絲絲好奇咁問佢點解會轉行，陳主席就話當時因為老婆劉矜蘭已經創辦咗中視金橋，但經營得唔係咁理想，於是決心與老婆一齊打天下。咁依家公司搞得有聲有色，陳主席都總算冇入錯行啦！
余絲韻