潮流興踢爆？繼維基解密後有佢，英國財政大臣歐思邦！佢今年五月上任至今，似乎對政府好多嘢都睇唔過眼，要發洩吓。
其中最令人驚訝嘅，係有150年歷史，用嚟載住財政預算案嘅紅色手提箱，原來一早唔見咗條鎖匙，而幾件財相傳統場合着嘅長袍，都喺白高敦在任期間唔見咗。
原來英國官方好多重要文件，都會放喺紅色木箱內傳遞。財政大臣呢個紅色手提箱，更加係全世界嘅焦點，皆因每年公布財政預算前，財政大臣都會喺唐寧街官邸門口，拎起呢個代代相傳、用咗150年嘅手提箱畀傳媒影相。然後先會去下議院，從箱內攞出份預算案出嚟讀。歐思邦忽然爆響口，條鎖匙唔見咗幾年，而個箱一直都係鎖住。
保守黨嘅歐思邦玩踢爆，矛頭似乎直指工黨嘅白高敦同埋戴理德，因前任財相白高敦喺九七至○七年在任期間，特登唔用呢個紅箱，而要特製另一個公事包嚟裝預算案。上一任財相戴理德在任時，明顯已經唔見咗條匙，但仍然每年攞個紅箱出嚟畀人影相。其實係咪想暗示前兩任財相都係唔誠實嘅人呢？
余絲韻