證券界老行尊蔡陳葆心○七年喺家鄉捐錢興建學校，喺唔少金融界有心人落力捐款下，學校每年都有新設施相繼落成，好似跑道、圖書館、球場等等。早前更成立了助學金，資助學業成績優異嘅學生，蔡太今次一行人返鄉下，就係要頒獎，鼓勵學校嘅師生。當然一場返到去學校，亦會視察吓學校還有甚麼設施需要，非常有心。
山長水遠返到家鄉做義工，亦要慰勞吓自己嘅！蔡太寓做義工於娛樂，做完嘢之後，當然唔會放過喺當地搵好嘢食嘅機會，佢會同一班朋友去食嘢。
蔡太話，潮州出名多嘢食，好似當地嘅龍蝦、螺片、墨魚蛋餅等等，好出名，而且喺香港都未必有得食。咁又係，如果唔係潮州地膽，真係未必識搵窿路。
絲絲未食過呢啲地道潮州美食，但聽到佢咁講，都已流晒口水！所以話，金融界嘅食家，真係為數唔少，唔知邊個可以封為「股壇食神」呢？
余絲韻